Amitabh bachchan health : बॉलिवूडचे महानायक अमिताभ बच्चन यांच्या प्रकृतीबाबत एक महत्त्वाची बातमी समोर आली असून, यामुळे त्यांच्या चाहत्यांची चिंता वाढली आहे. आपल्या दमदार आवाजाने, अभिनयाने आणि खास अंदाजाने गेल्या अनेक वर्षांपासून प्रेक्षकांच्या मनावर अधिराज्य गाजवणारे बिग बी सध्या छोट्या पडद्यावरील लोकप्रिय क्विझ शो ‘कौन बनेगा करोडपती’च्या (KBC) माध्यमातून प्रेक्षकांच्या भेटीला येत आहेत.

मात्र, या कार्यक्रमाच्या चित्रीकरणाला अचानक ब्रेक लागल्याची माहिती समोर आली आहे. गेल्या आठवड्यापासून नव्या भागांचे शूटिंग थांबवण्यात आल्याचे वृत्त असून, यामागे अमिताभ बच्चन यांच्या प्रकृतीविषयीची चिंता असल्याचे सांगितले जात आहे. त्यामुळे बिग बींच्या तब्येतीला नेमकं काय झालं, असा प्रश्न चाहत्यांकडून उपस्थित केला जात आहे.

नेमकं काय घडलं?

बिग बी सध्या फारसे बरे नसल्यामुळे निर्मात्यांनी नवीन भागांचे चित्रीकरण तात्पुरते थांबवण्याचा निर्णय घेतला आहे. त्यांच्या प्रकृतीत सुधारणा झाल्यानंतरच पुढील शूटिंगचे नियोजन करण्यात येणार असल्याचे सांगितले जात आहे. शूटिंग थांबल्यामुळे प्रेक्षकांची निराशा होऊ नये, यासाठी वाहिनीकडून यापूर्वी चित्रीत करण्यात आलेले सेलिब्रिटी स्पेशल भाग पुन्हा प्रसारित केले जात आहेत.

पुढील आठवड्यात शूटिंग सुरू होणार?

अमिताभ बच्चन यांच्या प्रकृतीत सुधारणा झाल्यास पुढील आठवड्यापासून ‘कौन बनेगा करोडपती’चे शूटिंग पुन्हा सुरू होण्याची शक्यता वर्तवण्यात आली आहे. मात्र, त्यांची तब्येत आणि डॉक्टरांचा सल्ला लक्षात घेऊनच अंतिम निर्णय घेतला जाणार असल्याचे सूत्रांनी सांगितले आहे. त्यामुळे सध्या निर्मात्यांचे लक्ष बिग बींच्या प्रकृतीकडे लागले आहे.

अमिताभ बच्चन यांनी ब्लॉगमध्ये काय म्हटलं?

एकीकडे त्यांच्या प्रकृतीबाबत चर्चा सुरू असताना अमिताभ बच्चन यांनी शनिवारी आपल्या ब्लॉगमध्ये काम आणि नियमित दिनचर्येकडे हळूहळू परतत असल्याचे म्हटले आहे. त्यांनी लिहिले की, ‘नियमित दिनचर्येकडे आणि कामाच्या नियंत्रित आयुष्याकडे हळूहळू परतण्याचा प्रवास सुरू आहे.

आपण जेव्हा रोजच्या दिनक्रमात असतो, तेव्हा त्या गोष्टींची सवय झालेली असते. मात्र, काही काळ त्या दिनक्रमापासून दूर राहिल्यानंतर पुन्हा त्याच गोष्टी वेगळ्या वाटू लागतात.’

याशिवाय, चष्मा आणि मोबाईल कुठे ठेवला, तसेच पुढे नेमकं काय करायचं होतं, यांसारख्या छोट्या गोष्टीही कधीकधी विसरायला होत असल्याचे त्यांनी आपल्या ब्लॉगमध्ये नमूद केले. मात्र, ब्लॉग वाचणारे चाहते, दर रविवारी भेटणारे चाहते आणि ‘कौन बनेगा करोडपती’चे प्रेक्षक यांच्याशी असलेले नाते कायम असल्याचेही त्यांनी आवर्जून सांगितले.