नवी दिल्ली : पहलगाम दहशतवादी हल्ल्यानंतर भारताने प्रत्युत्तरात्मक कारवाई करत पाकिस्तानसोबतचा सिंधू पाणी करार स्थगित केला. भारत पाकिस्तानसोबतचा हा करार पुनरुज्जीवित करण्याच्या मनस्थितीत नाही. गृहमंत्री अमित शहा यांनी स्पष्ट केले की, इस्लामाबादबरोबर सिंधू पाणी करार कधीही पूर्ववत केला जाणार नाही. अमित शहा यांनी एका खासगी वाहिनीला दिलेल्या मुलाखतीत हे स्पष्टपणे सांगितले. पाकिस्तानातून वाहणारे पाणी अंतर्गत वापरासाठी वळवले जाईल, असेही ते म्हणाले.

अमित शाह म्हणाले की, पहलगाम दहशतवादी हल्ल्यात २६ नागरिकांचा मृत्यू झाल्यानंतर, भारताने १९६० च्या करारातील आपला सहभाग रद्द केला. हा करार सिंधू नदी प्रणालीचा नियंत्रित वापर करतो. या कराराने भारतातून वाहणाऱ्या तीन नद्यांमधून पाकिस्तानच्या ८०% शेतांना पाण्याची हमी दिली होती. पहलगाम दहशतवादी हल्ल्यात पाकिस्तानने स्वतःची कोणतीही भूमिका नाकारली आहे.

परंतु दोन्ही देशांमधील तणावानंतर, युद्धबंदी करार असूनही हा करार निष्क्रिय आहे. शहा म्हणाले की, आम्ही एक कालवा बांधू आणि पाकिस्तानकडे वाहणारे पाणी राजस्थानला घेऊन जाऊ. पाकिस्तानला मिळणारे पाणी आता अजिबात मिळणार नाही. अमित शहा यांच्या नवीन टिप्पण्यांमुळे नजीकच्या भविष्यात या करारावर पुन्हा चर्चा करण्याच्या पाकिस्तानच्या आशा धुळीस मिळाल्या आहेत.

एकतर्फी माघार घेण्याची तरतूद नाही
सिंदू पाणी करार एकतर्फीपणे माघारी घेता येत नाही, अशी तरतूद खुद्द करारातच आहे. पाकिस्तानमध्ये वाहणारे नदीचे पाणी रोखणे हे युद्धाचे कृत्य मानले जाईल. आंतरराष्ट्रीय कायद्यानुसार हा करार स्थगित करण्याच्या भारताच्या निर्णयाला कायदेशीर आव्हान देण्याची शक्यता इस्लामाबाद देखील शोधत आहे.