US News: अमेरिकेचे राष्ट्राध्यक्ष डोनाल्ड ट्रम्प यांनी आपले निवडणूक आश्वासन पूर्ण करत मेक्सिको, कॅनडा आणि चीनमधून आयात होणाऱ्या उत्पादनांवर शुल्क आकारण्याची घोषणा केली आहे. हे शुल्क 2 फेब्रुवारी 2025 पासून लागू झाला आहे. अमेरिकेचे राष्ट्राध्यक्ष ट्रम्प यांनी हे पाऊल अमेरिकेला पुन्हा महान बनवण्याच्या दिशेने एक महत्त्वाचे पाऊल म्हटले आहे. तसेच, ट्रम्प यांनी हे देखील मान्य केले आहे की त्यांच्या या निर्णयामुळे काही काळ अमेरिकन ग्राहकांना महागाईचा सामना करावा लागू शकतो.

अमेरिकन लोकांवर टॅरिफ दरांचा किती परिणाम होईल?

कॅनडा आणि मेक्सिकोमधून आयात केलेल्या उत्पादनांवर 25% शुल्क (टॅरिफ) असेल. तथापि, कॅनडातून येणाऱ्या उर्जा उत्पादनांवर 10% शुल्क असेल. तर चीनमधून आयात केलेल्या उत्पादनांवर 10 टक्के शुल्क आकारले जाईल. या निर्णयामुळे अमेरिकन अर्थव्यवस्थेला हानी पोहोचू शकते, असे अर्थतज्ज्ञांचे मत आहे. या निर्णयामुळे रिटेलमध्ये उत्पादनांच्या किमती वाढतील. खाद्यपदार्थ, इंधन, कार, मद्य, इलेक्ट्रॉनिक्स, खेळणी आणि घर बांधणीची उत्पादने महाग होतील, असे बाजारातील तज्ज्ञांचे मत आहे.

अमेरिकेतील खाद्यपदार्थांच्या किमतींवर परिणाम होईल –

मेक्सिको आणि कॅनडा मधून अमेरिकन मार्केटमध्ये फळे, भाज्या, धान्ये, मांस आणि दुग्धजन्य पदार्थ मोठ्या प्रमाणात पाठवली जातात. मेक्सिकोहून येणाऱ्या फळे आणि भाज्यांवर जास्त शुल्क आकारल्याने अमेरिकेतील किराणा बाजारातील किमती वाढू शकतात. अमेरिकेने 2024 मध्ये मेक्सिकोमधून $46 अब्ज किमतीची कृषी उत्पादने आयात केली आहेत. यामध्ये $8.3 अब्ज किमतीच्या ताज्या भाज्या, $5.9 अब्ज किमतीच्या बिअर आणि $5 बिलियन किमतीच्या डिस्टिल्ड स्पिरिटचा समावेश आहे. टोमॅटो आणि इतर ताज्या फळांच्या किमती वाढणार आहेत.

इंधन आणि ऊर्जा –

कॅनडा हा अमेरिकेला तेल आणि वायूचा सर्वात मोठा पुरवठादार आहे. 2024 मध्ये, अमेरिकेने कॅनडातून $97 अब्ज किमतीचे तेल आणि वायू आयात केला आहे. नवीन 10% दराचा अमेरिकन तेल आणि वायू उद्योगावर परिणाम होण्याची खात्री आहे कारण अमेरिकेतील 60% तेलाचा पुरवठा कॅनडामधून होतो. त्यामुळे अमेरिकेत पेट्रोल आणि डिझेलच्या किमती वाढण्याची शक्यता आहे.

कार आणि कारचे पार्ट्स –

अमेरिकेतील कॅनडा आणि मेक्सिको येथून आयात होणाऱ्या कार आणि कारच्या पार्ट्सवरील शुल्क वाढवल्यामुळे वाहनांच्या किमती वाढणार आहेत. 2024 मध्ये, अमेरिकेने कॅनडातून $34 अब्ज किमतीची वाहने आणि मेक्सिकोमधून $87 अब्ज किमतीची वाहने आणि $64 अब्ज किमतीची वाहनांचे पार्ट्स आयात केली. नवीन टॅरिफ धोरणाचा अमेरिकन वाहन उत्पादन उद्योग आणि ग्राहकांना मोठा फटका बसणार आहे.

वाइन आणि बिअरवर परिणाम –

नव्या दराचा परिणाम अमेरिकन मद्य बाजारावरही होणार आहे. अमेरिकेने 2023 मध्ये मेक्सिकोमधून $5.69 अब्ज किमतीची बिअर आणि $4.81 अब्ज किमतीची वाईन आयात केली होती. टकीला आणि बिअरच्या किमतींमध्ये वाढ शक्य आहे कारण टकीला फक्त मेक्सिकोमध्येच तयार होते. Modelo, Corona आणि Casa Noble Tequila सारख्या प्रमुख ब्रँडच्या किमती सुमारे 4.5% वाढू शकतात.

इलेक्ट्रॉनिक्स आणि खेळण्यांवर परिणाम –

चीनमधून आयात केलेले मोबाइल फोन, संगणक आणि इतर इलेक्ट्रॉनिक उत्पादने महाग होऊ शकतात. अमेरिका फुटबॉल, बेसबॉल आणि व्हिडिओ गेम उपकरणांसह 75% खेळणी आणि गेम उपकरणे चीनकडून आयात करते.

घर बांधणे महाग होईल –

घरे बांधण्यासाठी वापरली जाणारे 30 टक्के लाकूड कॅनडातून आयात केली जाते. सॉफ्टवुड लाकूड आणि जिप्सम (ड्रायवॉल बनवण्यासाठी वापरल्या जाणाऱ्या) च्या दरात वाढ झाल्यामुळे घर बांधण्याची किंमत वाढेल. यामुळे अमेरिकेत घर खरेदी करणे अधिक महाग होईल.

अमेरिकेवर काय परिणाम होईल?

ट्रम्प यांच्या टॅरिफ धोरणाचा अमेरिकन अर्थव्यवस्थेवर नकारात्मक परिणाम होऊ शकतो, असे अर्थतज्ज्ञांचे मत आहे. अमेरिकेत महागाई वाढेल. यामुळे जीवनावश्यक वस्तूंसाठीही ग्राहकांना जास्तीचे दर मोजावे लागणार आहेत. मात्र, या पाऊलामुळे दीर्घकाळात अमेरिकेची अर्थव्यवस्था मजबूत होईल, असा ट्रम्प यांचा दावा आहे.