Masoud Pezeshkian : गेल्या चार महिन्यांपासून रखडलेल्या युद्धाला थांबवण्यासाठी अमेरिकेबरोबरचा सामंजस्य करार हाच सर्वोत्तम मार्ग आहे, असे इराणचे अध्यक्ष मसूद पेझेश्‍कीयान (Masoud Pezeshkian) यांनी म्हटले आहे. मात्र जर इराणवर निर्बंध घालण्यासाठी शेजारच्या देशांनी अमेरिकेला मदत केल्यास त्यांच्यावर अधिक जोरदार प्रतिहल्ले करण्याचा इशारा इराणच्या रिव्होल्युशनरी गार्डने दिला आहे.

इराणचे अध्यक्ष पेझेश्‍कीयान (Masoud Pezeshkian) यांनी युद्ध समाप्त करण्यासाठी अमेरिकेबरोबरचा सामंजस्य करार हाच सर्वोत्तम मार्ग असल्याचे म्हटले आहे. तसे झाले नाही, तर सध्या ना युद्ध ना शांतता अशी कोंडीची परिस्थिती कायम राहिल, असे ते म्हणाले.

या करारामध्ये शरणागती मानली जाईल अशी एकही तरतूद नाही, असे पेझेश्‍कीयान सरकारी वृत्तवाहिनीवरून दिलेल्या बाषणात म्हणाले. मात्र त्याच बरोबर देशाच्या सर्वोच्च नेत्यांकडून देशाचे धोरण निश्‍चित केले गेले आहे आणि आपण त्याची अंमलबजावणी करत आहोत, असेही ते म्हणाले.

इराण-अमेरिकेमध्ये जूनमध्ये झालेल्या सामंजस्य करारानुसार इराणच्या अणू कार्यक्रमाबाबत वाटाघाटींसाठी ६० दिवसांची मुदत ठरवली गेली होती. ही मुदत अलिकडेच समाप्त झाली आहे. परंतू या काळात कोणतीच चर्चा होऊ शकली नाही. मात्र सध्याच्या परिस्थितीमध्ये देशात कोणतीही गुंतवणूक होऊ शकली नाही, याकडेही पेझेश्‍कीयान यांनी लक्ष वेधले.

आंदोलनातील सहभागाबद्दल एकाला फाशी
इराणमध्ये जानेवारी महिन्यात झालेल्या आंदोलनात सहभागी झाल्याच्या आरोपावरून मजिद मदिनेह नावाच्या व्यक्तीला फाशी देण्यात आले. त्याला ९ जानेवारी रोजी तेहरानच्या पश्चिमेला असलेल्या करजजवळील मोहम्मदशहर येथे अटक करण्यात आली होती. त्याच्याकडे ३० काडतुसे असलेली एक हँडगन, दोन स्टन गन, अश्रुवायूचे दोन कॅन आणि बॅटरीवर चालणारी एक चेन सॉ होती, असे अधिकाऱ्यांनी सांगितले.

त्या पिस्तुलातून ८ आणि ९ जानेवारी रोजी गोळीबार करण्यात आला होता, असे न्यायवैद्यक तपासणीत दिसून आले होते. कराज येथील रिव्होल्युशनरी न्यायालयाने हेरगिरी आणि शत्रू राष्ट्रांशी सहकार्य केल्याबद्दल कठोर शिक्षा देणाऱ्या इराणच्या कायद्यानुसार अदिनेहला दोषी ठरवले होते.

गाझामध्ये इस्रायलचा हवाई हल्ला
रविवारी मध्य गाझामधील एका घरावर झालेल्या इस्रायली हवाई हल्ल्यात चार वर्षांचा मुलगा मरण पावला, असे रुग्णालयाने सांगितले. झवाईदा शहरात झालेल्या हल्ल्यात एका मुलासह किमान पाच इतर लोकही जखमी झाले. काही वेळापुर्वीच इस्रायली सैन्याने या भागातील घरे रिकामी करण्याची सूचना स्थानिक नागरिकांना दिली होती.

या हवाई हल्ल्याबाबत (Masoud Pezeshkian) इस्रायलच्या लष्कराने तात्काळ प्रतिसाद दिला नाही. गाझाला लागून असलेल्या इस्रायली वस्त्यांच्या दिशेने येणारे बलून, पतंग किंवा ड्रोनना रोखण्यासाठी लष्कराला तात्काळ आणि जोरदार कारवाई करण्याचे निर्देश दिले असल्याचे इस्रायलचे संरक्षण मंत्री इस्रायल काट्झ यांनी रविवारी सांगितले. २०२३ मध्ये हमासने केलेल्या हल्ल्याच्या आगोदर गाझामधून पेटते पतंग आणि बलून इस्रायलच्या हद्दीमध्ये सोडले गेले होते. यामुळे इस्रायलच्या दक्षिणेकडील भागात आग लागली होती.