Alexander Zverev Champion : अमेरिकन चाहत्यांचे स्वप्न पुन्हा भंगले! अलेक्झांडर झ्वेरेव्हने बेन शेल्टनवर मात करत यूएस ओपन ट्रॉफीवर कोरलं नाव
Alexander Zverev Champion : यूएस ओपनच्या अंतिम सामन्यात बेन शेल्टनच्या रूपाने देशाला २२ वर्षांनंतर पहिला पुरुष एकेरी ग्रँड स्लॅम विजेता मिळेल अशी अपेक्षा होती, पण जर्मनीच्या अलेक्झांडर झ्वेरेव्हने त्याचे स्वप्न भंग केले.
Alexander Zverev Beats Ben Shelton To Win US Open 2026 Mens Singles Title Career Second Grand Slam : जर्मनीचा अव्वल टेनिसपटू अलेक्झांडर झ्वेरेव्हने (Alexander Zverev) आपल्या कारकिर्दीतील सुवर्णकाळ सुरू ठेवत यूएस ओपन २०२६ (US Open 2026) चे पुरुष एकेरीचे जेतेपद पटकावले आहे. न्यूयॉर्कमध्ये रंगलेल्या अंतिम सामन्यात झ्वेरेव्हने स्थानिक लाडका खेळाडू २३ वर्षीय बेन शेल्टनचा ६-३, ७-६ (२), ५-७, ६-२ असा चार सेटच्या लढतीत पराभव केला. २००३ मध्ये अँडी रॉडिकनंतर अमेरिकेचा कोणताही पुरुष खेळाडू ग्रँड स्लॅम जिंकू शकलेला नाही; शेल्टनच्या पराभवाने अमेरिकेची ही २३ वर्षांची प्रदीर्घ प्रतीक्षा कायम राहिली आहे.
फ्रेंच ओपननंतर यूएस ओपनवरही कब्जा; २०२० मधील कटू आठवणी पुसल्या!
२०२६ हे वर्ष झ्वेरेव्हनेसाठी स्वप्नवत ठरले आहे. वर्षाच्या मध्यात फ्रेंच ओपन जिंकून कारकिर्दीतील पहिल्या ग्रँड स्लॅमला गवसणी घालणाऱ्या झ्वेरेव्हने आता वर्षाचा शेवटही ऐतिहासिक ट्रॉफीने केला. विशेष म्हणजे, २०२० च्या यूएस ओपन फायनलमध्ये हातातोंडाशी आलेला घास निसटल्याने त्याला पराभवाचे अश्रू ढाळावे लागले होते; मात्र यंदा त्याने त्या पराभवाची सल पूर्णपणे पुसून काढत न्यूयॉर्कमध्ये मानाचा चषक उंचावला.
नंबर-१ सीडची यशस्वी धुरा; टाई-ब्रेकमध्ये शेल्टनचा उडवला धुव्वा!
HE DIDN’T REALIZE HE’D WON 🏆
Alexander Zverev exorcises his 2020 demons and defeats Shelton 6-3, 7-6, 5-7, 6-2 to win his first US Open title! pic.twitter.com/f0Cnl2xvgI
— US Open Tennis (@usopen) September 13, 2026
आपल्या कारकिर्दीत पहिल्यांदाच एखाद्या ग्रँड स्लॅममध्ये ‘नंबर-१ सीड’ म्हणून उतरलेल्या झ्वेरेव्हने सुरुवातीपासूनच दबदबा राखला. शेल्टनने पहिल्या गेममध्ये केलेल्या डबल फॉल्टचा फायदा घेत झ्वेरेव्हने पहिला सेट ६-३ ने जिंकला. दुसऱ्या सेटमध्ये शेल्टनने कडवी झुंज दिली; मात्र झ्वेरेव्हने अप्रतिम कामगिरी करत टायब्रेक ७-२ ने सहज जिंकून सामन्यावर पकड मजबूत केली.
शेल्टनची तिसऱ्या सेटमध्ये झुंज व्यर्थ; चाहत्यांचा पुरता भ्रमनिरास!
New York. New Sascha. 🗽
Six years on from final heartbreak, Alexander Zverev is a US Open champion at last! pic.twitter.com/MojOJG3HdK
— US Open Tennis (@usopen) September 13, 2026
तिसऱ्या सेटमध्ये शेल्टनने ७-५ ने बाजी मारत पुनरागमनाचे संकेत दिले होते. फुटबॉलपटू गर्लफ्रेंड ट्रिनिटी रॉडमनसह हजारो स्थानिक प्रेक्षकांनी त्याला जोरदार पाठिंबा दिला. मात्र, निर्णायक चौथ्या सेटमध्ये कोणतीही चूक न करता झ्वेरेव्हने ६-२ ने एकतर्फी सेट आणि सामना खिशात घातला. या विजयासह झ्वेरेव्हने शेल्टनविरुद्धचा आपला रेकॉर्ड ६-० असा एकतर्फी राखला आहे.
