आळंदी, – शाळेतील मुलींसोबत अत्याचाराच्या घटना घडू नये म्हणून मुलींनी काय काळजी घ्यावी या करिता आळंदी पोलिस ठाण्यातील दामिनी पथकाकडून पोलिस ठाण्याच्या हद्दीतील शाळांमध्ये जाऊन सातत्याने ‘गुड टच बॅड टच’ ओळखण्यासाठी जनजागृती करण्यात येते. अशातच एका शाळेत याबाबत अल्पवयीन मुलींना माहिती देताना घरा शेजारी राहणाऱ्या एका इसमाने दुचाकी चालवायला शिकवण्याच्या बहाण्याने मुलींना दुचाकीवर पुढे बसवून छेडछाड व विनयभंग केल्याचा धक्कादायक प्रकार उघडकीस आला आहे. विनयभंग करणाऱ्यास पोलिसांनी ताब्यात घेतले आहे. याबाबत सविस्तर माहिती अशी की, आळंदी पोलीस ठाणे हद्दीमध्ये नेमण्यात आलेल्या दामिनी पथकातील महिला पोलीस अंमलदार दौंडकर व तळपे यांना वरिष्ठ पोलिस निरीक्षक बी.एस. नरके यांनी हद्दीतील शाळांना भेट देवून अल्पवयीन मुलींना ‘गुड टच बॅड टच’ची महिती देण्याबाबत आदेश दिले होते. त्याप्रमाणे सदर दामिनी पथकातील महिला पोलिस अंमलदार यांनी आळंदी पोलीस ठाणे हद्दीतील विविध शाळांना भेटी दिल्या. तेथील मुलींना महिला अत्याचारासंदर्भात घडणाऱ्या घटनेबाबत मार्गदर्शन केले. त्यावर उपाय योजना व प्रतिबंध करण्याचे अनुषंगाने मार्गदर्शन केले. यादरम्यान एका शाळेमधील दोन अल्पवयीन मुलींनी त्यांचेसोबत यापूर्वी घडलेला प्रकार सांगितला. सदर प्रकारामध्ये मुलींच्या घराशेजारी राहणाऱ्या एक इसमाने त्या दोन लहान मुलींना मी तुम्हाला मोटार सायकल शिकवितो असे सांगून त्यांना वेळोवेळी मोटार सायकल शिकविण्याच्या बहाण्याने सोबत नेले. दुचाकीवर समोर बसवून त्यांचेसोबत छेडछाड करून विनयभंग केल्याचा प्रकार सदर मुलींनी दामिनी पथकाचे महिला अंमलदार यांना सांगितला. त्यानंतर एक पथक तयार करुन सदर इसमास पोलिसांनी ताब्यात घेतले आहे. याप्रकरणी विनयभंग व पोक्सो अंतर्गत गुन्हा दाखल करण्यात आला असून पुढील तपास आळदी पोलीस करत आहेत. आळंदी पोलिस ठाणे हद्दीतील वडगांव घेनंद येथे ही घटना उघडकीस आली.
