Alandi Double Murder – आळंदी परिसरात घडलेल्या दुहेरी हत्याकांडाने शहर हादरून गेले असताना पोलिसांनी अवघ्या काही तासांत या प्रकरणाचा उलगडा करत फरार आरोपीला आळेफाटा येथून अटक केली आहे. विनायक तुकाराम भवारी (वय 31) असे या आरोपीचे नाव आहे. सहा वर्षीय चिमुकली धनश्री केदारी आणि 70 वर्षीय मंगल शिंदे यांच्या निर्घृण हत्येमुळे परिसरात भीती व हळहळ व्यक्त होत आहे. या प्रकरणी पिंपरी-चिंचवड गुन्हे शाखा युनिट तीनच्या पथकाने वेगाने तपास करत आरोपी विनायक भवारी (वय 31) याला आळेफाटा येथून अटक केली. विशेष म्हणजे, आरोपी हा मृत धनश्रीचा नात्याने आजोबा असल्याचे तपासात समोर आले आहे. बुधवारी रात्री आरोपी विनायक भवारी हा संबंधित घरात आला. तो संगीता केदारी यांचा पती असल्याने घरातील व्यक्तींना परिचित होता. त्या वेळी धनश्री आणि मंगल शिंदे या दोघी घरात झोपल्या होत्या. संगीता केदारी या रुग्णालयात नाईट ड्युटीवर गेल्या होत्या. काही वेळ संवाद झाल्यानंतर आरोपीच्या मनात संशय निर्माण झाला. मंगल शिंदे या आपल्या पत्नीला आपल्या विरोधात भडकवत असल्याचा संशय त्याला होता. याच संशयातून संतापाच्या भरात त्याने प्रथम मंगल शिंदे यांचे डोके भिंतीवर आपटून त्यांची हत्या केली. त्यानंतर सहा वर्षीय निष्पाप धनश्रीचा उशीने तोंड दाबून खून केल्याचे तपासात उघड झाले आहे. कौटुंबिक वादातून प्रकार संगीता केदारी आणि विनायक भवारी यांचा दोन वर्षांपूर्वी सोशल मीडियावर परिचय होऊन प्रेमविवाह झाला होता. मात्र, गेल्या काही काळापासून त्यांच्यात मतभेद निर्माण झाले होते आणि आरोपी वेगळा राहत होता. या कौटुंबिक वादातूनच हा दुर्दैवी प्रकार घडल्याचे समोर आले आहे. घटना घडल्यानंतर आरोपीने पळ काढत आळेफाटा येथे आश्रय घेतला होता. मात्र, पोलीस निरीक्षक कसबे यांच्या मार्गदर्शनाखाली उपनिरीक्षक भरत गोसावी यांच्या पथकाने अचूक माहितीच्या आधारे सापळा रचून आरोपीला अटक केली.
