Akurdi Electricity Issue – पिंपरी विधानसभा मतदारसंघातील प्रभाग क्रमांक १४ (आकुर्डी) परिसरात वारंवार खंडित होणाऱ्या वीजपुरवठ्यामुळे नागरिक त्रस्त झाले असून ही समस्या तातडीने सोडविण्याची मागणी राष्ट्रवादी काँग्रेसच्या नगरसेवकांनी महावितरणकडे केली आहे. आवश्यक कामांसाठी निधीची कमतरता असल्यास स्थानिक आमदार व जिल्हा नियोजन समितीच्या माध्यमातून निधी उपलब्ध करून देण्याची तयारीही त्यांनी दर्शविली.

राष्ट्रवादी काँग्रेसचे नगरसेवक प्रमोद कुटे, नगरसेविका वैशाली काळभोर आणि नगरसेविका अरुणा लंगोटे यांनी महावितरणच्या भोसरी विभागाच्या अधिकाऱ्यांसोबत बैठक घेत आकुर्डी परिसरातील वीजपुरवठ्याच्या समस्येवर चर्चा केली. यावेळी सामाजिक कार्यकर्ते गणेश लंगोटे उपस्थित होते. मोहननगर, काळभोरनगर, रामनगर, दत्तवाडी, विठ्ठलवाडी, विवेकनगर, चिंचवड स्टेशन, साईबाबा नगर,

शुभश्री सोसायटी, ऐश्वर्यम सोसायटी आणि क्रांतीनगर या भागात वारंवार वीजपुरवठा खंडित होत असल्याने नागरिकांना मोठ्या गैरसोयीचा सामना करावा लागत आहे. त्यामुळे ही समस्या तातडीने दूर करून अखंडित वीजपुरवठा सुरू करावा, अशी मागणी नगरसेवकांनी अधिकाऱ्यांकडे केली. यावेळी संबंधित कामांसाठी निधीची कमतरता असल्यास आवश्यक कामांचे अंदाजपत्रक तयार करून सादर करण्याचे आवाहन करण्यात आले.

विधानसभा उपाध्यक्ष तथा पिंपरीचे आमदार अण्णा बनसोडे यांच्या स्थानिक विकास निधीतून तसेच उपमुख्यमंत्री व पुणे जिल्ह्याच्या पालकमंत्री सुनेत्रा पवार यांच्या माध्यमातून जिल्हा नियोजन समितीच्या निधीतून आवश्यक आर्थिक तरतूद करण्याचा प्रयत्न केला जाईल, असे नगरसेवकांनी स्पष्ट केले. यासंदर्भात लवकरच उपमुख्यमंत्री सुनेत्रा पवार यांची भेट घेऊन निधीबाबत पाठपुरावा करण्यात येणार असल्याची माहिती त्यांनी दिली.