Akshara Singh Death Threat : भोजपुरी इंडस्ट्रीतील प्रसिद्ध अभिनेत्री आणि बिग बॉस फेम ‘अक्षरा सिंग’ला जीवे मारण्याची धमकी देण्यात आली आहे. कॉलवर अभिनेत्रीला ही धमकी देण्यात आली असून, शिवीगाळ करण्यासोबतच 50 लाख रुपयांची मागणी करण्यात आली आहे. अक्षरा सिंगला तिची मागणी पूर्ण करण्यासाठी फक्त 2 दिवसांचा अवधी देण्यात आला आहे. अक्षराने दानापूर पोलीस ठाण्यात लेखी तक्रार दिली आहे. हा कॉल कोणत्या नंबरवरून आला होता, याचा तपास आता पोलिसांनी सुरू केला आहे. अक्षरा सिंहने आपल्या तक्रारीत पोलिसांना सांगितले आहे की, 11 नोव्हेंबरच्या रात्री 12.20 किंवा 12.21 च्या सुमारास तिला दोन वेगवेगळ्या नंबरवरून कॉल आला. अभिनेत्रीने फोन उचलताच लोकांनी तिला शिवीगाळ करण्यास सुरुवात केली. याशिवाय अभिनेत्रीला फोनवरून धमकी देऊन दोन दिवसांत 50 लाखांची खंडणी न दिल्यास तिची हत्या केली जाईल, असे सांगितले होते. अशा परिस्थितीत अक्षरा थेट पोलिसांकडे मदतीसाठी गेली. अक्षरा सिंग यांनी फिर्याद दिली…. पोलिस स्टेशनचे प्रमुख प्रशांत कुमार भारद्वाज यांनी सांगितले की, अक्षरा सिंहने खंडणी आणि खुनाची धमकी दिल्याची तक्रार करणारा अर्ज दाखल केला आहे. या प्रकरणाचा तपास सुरू असून फोन करणाऱ्याला लवकरच पकडण्यात येईल, असे पोलिसांचे म्हणणे आहे. अक्षरा सिंह यांच्यापूर्वी पूर्णिया लोकसभा मतदारसंघातील अपक्ष खासदार पप्पू यादव यांनाही धमकी देण्यात आली होती. पप्पू यादवच्या धमकीमागे लॉरेन्स बिश्नोई टोळीचे नावही समोर येत आहे. गेल्या काही महिन्यांपासून सुपरस्टार सलमान खानला सतत धमक्या येत आहेत. ज्यांनी त्याला धमकी दिली ते लॉरेन्स बिश्नोई टोळीचे सदस्य असल्याचा दावा केला. सलमानची सुरक्षा वाढवण्यात आली आहे. अलीकडेच शाहरुख खानलाही धमकी देण्यात आली होती. एवढेच नाही तर सलमान खानचा जवळचा सहकारी आणि नेता बाबा सिद्दीकी यांची गोळ्या झाडून हत्या करण्यात आली.
