Maharashtra Politics : महाराष्ट्रातील स्थानिक स्वराज्य संस्थांच्या निवडणुकांच्या तोंडावर राजकीय पक्षांत फोडाफोडीचे राजकारण तापले आहे. सत्ताधारी महायुतीतही अंतर्गत स्पर्धा तीव्र झाली असून, एकमेकांना धक्के देण्याचा प्रयत्न सुरू आहे. रायगडमध्ये उपमुख्यमंत्री एकनाथ शिंदे यांच्या शिवसेनेला मोठा धक्का बसला आहे.

जिल्हा परिषदेच्या दासगाव खाडी पट्टा मतदारसंघातील संभाव्य उमेदवार सुशांत जाबरे यांनी शेकडो कार्यकर्त्यांसह अजित पवार गटाच्या राष्ट्रवादी काँग्रेसमध्ये प्रवेश केला आहे. दुसरीकडे, सिंधुदुर्गमध्ये मात्र शिंदे शिवसेनेला फायदा झाला असून, माजी जिल्हा परिषद अध्यक्ष आणि राष्ट्रवादीचे विद्यमान जिल्हा कार्यकारी अध्यक्ष काका कुडाळकर यांनी अजित पवार गट सोडून शिंदे शिवसेनेत दाखल झाले आहेत. या दोन्ही पक्षप्रवेशांमुळे कोकणातील राजकीय वातावरण ढवळून निघाले आहे.

रायगड जिल्ह्यातील महाड तालुक्यातील दासगाव खाडी पट्टा विभाग हा शिवसेना (शिंदे गट)चा बालेकिल्ला मानला जातो. येथील संभाव्य जिल्हा परिषद उमेदवार सुशांत जाबरे हे मंत्री भरत गोगावले यांचे कट्टर समर्थक आणि पुत्र विकास गोगावले यांचे निकटवर्तीय होते. मात्र, रविवारी (२ नोव्हेंबर) जाबरे यांनी शेकडो कार्यकर्त्यांसह अजित पवार गटात प्रवेश केला. हा सोहळा खासदार सुनील तटकरे आणि स्नेहल जगताप यांच्या उपस्थितीत पार पडला, यामुळे राष्ट्रवादीची ताकद वाढली आहे.