मुंबई: महाराष्ट्र विधानसभा निवडणुकीत महायुतीने दमदार कामगिरी करत 232 जागांवर विजय मिळवला, तर महाविकास आघाडीला केवळ 50 जागांवर समाधान मानावे लागले. लोकसभा निवडणुकीतील यशानंतर महाविकास आघाडीला हा मोठा धक्का बसला असून, राज्यात पुन्हा एकदा महायुतीचे सरकार स्थापन झाले आहे.

या विजयानंतर महाविकास आघाडीला सातत्याने धक्के बसत आहेत. शिवसेना ठाकरे गटातील अनेक नेते शिंदे गटात सामील झाले, तर काँग्रेस आणि राष्ट्रवादी शरद पवार गटातील नेते भाजप आणि राष्ट्रवादी अजित पवार गटात प्रवेश करत आहेत. यातच काँग्रेसला आणखी एक मोठा झटका बसला आहे. काँग्रेसच्या प्रदेश उपाध्यक्षा प्रतिभा शिंदे यांनी आपल्या हजारो कार्यकर्त्यांसह जळगाव येथे आयोजित राष्ट्रवादीच्या मेळाव्यात अजित पवार यांच्या उपस्थितीत राष्ट्रवादी अजित पवार गटात प्रवेश केला. काही दिवसांपूर्वीच त्यांनी आपल्या पदाचा राजीनामा दिला होता, आणि त्यांच्या पक्षांतराची चर्चा सुरू होती.

आगामी स्थानिक स्वराज्य संस्थांच्या निवडणुकांच्या पार्श्वभूमीवर प्रतिभा शिंदे यांचा हा प्रवेश काँग्रेससाठी मोठा धक्का मानला जात आहे. जळगावातील या मेळाव्यात अजित पवार म्हणाले, “सत्तेत असतानाच निर्णय घेता येतात आणि धोरणे ठरवता येतात. प्रतिभा शिंदे, तुम्हाला राष्ट्रवादीत येण्याचा निर्णय कधीही चुकीचा वाटणार नाही. आमचे सर्व सहकारी तुमच्यासोबत एकत्र काम करतील. गेल्या 35-40 वर्षांत आम्ही अनेक चढ-उतार पाहिले. सत्तेत असताना प्रश्न सुटतात, सत्ता नसताना अडचणींचा अनुभव येतो.” प्रतिभा शिंदे यांच्या प्रवेशामुळे जळगावमध्ये राष्ट्रवादी अजित पवार गटाची ताकद वाढणार असून, स्थानिक स्वराज्य संस्थांच्या निवडणुकांवर याचा मोठा परिणाम होऊ शकतो.