Ajit Pawar | गेल्या काही दिवसांपासून पुण्यातील प्रसिद्ध दीनानाथ मंगेशकर रुग्णालय गर्भवती मातेच्या मृत्यू प्रकरणी चर्चेत आहे. २९ मार्च रोजी गर्भवती असलेल्या तनिषा भिसे (वय २७ वर्ष) यांचा पैशांअभावी उपचार न मिळल्याने मृत्यू झाल्याचा आरोप भिसे कुटुंबीयांनी मंगेशकर रुग्णालयावर केला आहे. या प्रकरणामुळे पुण्यासह राज्यभरातून संतापाची तीव्र लाट उसळून आली होती.

या प्रकरणी उपमुख्यमंत्री आणि पुणे जिल्ह्याचे पालकमंत्री अजित पवार यांनी कुठल्याही रुग्णालयात प्रत्येक व्यक्तीचा जीव महत्त्वाचा असतो. वैद्यकीय क्षेत्रातील लोकांनी सेवाभावी वृत्तीने काम केलं पाहिजे. चांगल्या सेवा मिळाव्यात म्हणूनच शासनाकडून रुग्णालयाला निधी दिला जातो, असे अजित पवार म्हणाले. महात्मा फुले यांची आज जयंती असून अजित पवार कार्यक्रमासाठी पुण्यात आले आहेत. त्यावेळी ते बोलत होते.

या प्रकरणाची गंभीर दखल राज्य शासनाने घेतली असून या प्रकरणाची चौकशी करण्यासाठी पाच सदस्यांच्या समितीने रुग्णालयाची चौकशी केली असून त्याचा अहवाल राज्य शासनाला देण्यात आला आहे. यावर बोलताना अजित म्हणाले, मुख्यमंत्री यांच्याकडे या प्रकरणाचा दुसरा अहवाल पोहोचला आहे. तिसरा अहवाल आल्यानंतर शासन योग्य ती कारवाई करेल, असे सांगितले. तसेच केंद्रीय गृहमंत्री अमित शहा लवकरच पुण्यात येणार आहेत. त्यामुळे मुख्यमंत्री या प्रकरणावर त्यांच्याशी चर्चा करतील, अशी माहिती अजित पवार यांनी माध्यमांशी बोलताना दिली.

अप्रत्यक्षपणे टीका 

रुग्णालय हे धर्मादाय आयुक्तांच्या अधिपत्याखाली आहे. आम्ही सरकारी पैसे चांगल्या सुविधा मिळाव्यात म्हणून देतो. तिसरा अहवाल येऊ द्या, एवढे पैसे हळदी-कुंकू पूजेसाठी ठेवलेत का, असा प्रश्न अजित पवार यांनी यावेळी बोलताना उपस्थित केला. अप्रत्यक्षपणे त्यांनी रुग्णालयावर टीका केली.