Jamkhed News : ज्ञानाचे मंदिर म्हणून ओळखल्या जाणाऱ्या जामखेड तालुक्यातील (Jamkhed News) हाळगाव येथील पुण्यश्लोक अहिल्यादेवी होळकर कृषी महाविद्यालयाच्या वसतिगृहात गुंडगिरीचा अतिशय क्रूर चेहरा समोर आला आहे.

उच्च शिक्षणाचे स्वप्न उराशी बाळगून निमगाव घाना येथून आलेल्या १८ वर्षीय वेदांत दगडू तळुले या विद्यार्थ्याला रॅगिंगच्या नावाखाली अमानुष मारहाणीला सामोरे जावे लागले. धक्कादायक म्हणजे, महाविद्यालयाची बदनामी टाळण्यासाठी आणि नराधम आरोपींना वाचवण्यासाठी प्रशासकीय पातळीवर हे प्रकरण दाबण्याचा जोरदार कट रचला गेला होता; मात्र पीडित तरुणाच्या धाडसामुळे हा संतापजनक प्रकार चव्हाट्यावर आला आहे.

७ सप्टेंबरच्या सकाळी सुरू झालेला छळाचा हा प्रकार ८ सप्टेंबरच्या मध्यरात्री थेट हिंसक हल्ल्यात बदलला. रात्री सव्वा बाराच्या सुमारास वेदांत आपल्या खोलीत गाढ झोपेत असताना आरोपींनी दरवाजाची कडी तोडून आत प्रवेश केला. खोलीत घुसताच (Jamkhed News) या गुंडांनी वेदांतवर लाकडी काठ्या, लाथाबुक्क्यांनी तुटून पडत त्याच्या डोक्यात, बरगड्यांवर, हाता-पायांवर आणि पोटावर बेदम प्रहार केले.

वेदांत वेदनेने विव्हळत असताना, “रेक्टर कुलकर्णी यांच्याकडे आमची तक्रार करण्याची हिंमत कशी झाली?” असा जाब विचारत आरोपींनी त्याला अर्वाच्च शिवीगाळ केली. “या कॉलेजमध्ये राहायचे असेल तर आमच्या मर्जीनेच वागावे लागेल, नाहीतर परिणाम भोगावे लागतील,” अशी उघड धमकी देत आरोपींनी वसतिगृहात दहशतीचे वातावरण निर्माण केले.

घटनेनंतर महाविद्यालयात सुरू झालेली दाबादाबी झुगारून वेदांतने थेट जामखेड पोलीस ठाणे गाठले. या तक्रारीनंतर पोलिसांनी तात्काळ कारवाई करत ऋतीक दत्तात्रय शेळके, पियुष कुंभार, सुशील हेमंत मालकाने, प्रतिक कुमार वाघमोडे यांच्यासह त्यांच्या अन्य अनोळखी साथीदारांवर गुन्हा रजि. नं. ६३०/२०२६ अन्वये भारतीय न्याय संहिता (BNS) आणि महाराष्ट्र रॅगिंग प्रतिबंध कायदा १९९९ मधील कलम ४ नुसार गुन्हा दाखल केला आहे.

पोलीस निरीक्षक दशरथ चौधरी यांनी पथकासह घटनास्थळी भेट देऊन तपासाची चक्रे फिरवली आहेत. या भीषण प्रकारानंतर आता रॅगिंग करणारे टोळके आणि त्यांना पाठीशी घालणारे प्रशासन यांच्यावर पोलीस नेमकी काय कारवाई (Jamkhed News) करणार, याकडे सर्वांचे लक्ष लागले आहे.