पिंपरी : पिंपरी चिंचवड एज्युकेशन ट्रस्ट (पीसीईटी), पिंपरी चिंचवड विद्यापीठ (पीसीयु) आणि न्यूझीलंड भारत चेंबर ऑफ कॉमर्स अँड इंडस्ट्री (एनझेडबीसीसीआय) यांच्यातील शैक्षणिक सामंजस्य करारामुळे प्राध्यापक, विद्यार्थ्यांना संशोधन, इंटर्नशिप याबरोबरच न्युझीलंड मधील पर्यटन आणि आर्थिक विकास अभ्यासाची संधी मिळाली आहे.

निगडी येथील पीसीईटीच्या कार्यालयात या सामंजस्य करारावर स्वाक्षऱ्या करण्यात आल्या. यामुळे रोजगारभिमुख शैक्षणिक प्रगतीला तसेच युवा उद्योजकांना आंतरराष्ट्रीय स्तरावर व्यवसाय वृद्धीसाठी चालना मिळेल, असे प्रतिपादन न्यूझीलंड भारत चेंबर ऑफ कॉमर्स अँड इंडस्ट्रीचे अध्यक्ष महेश बिंद्रा यांनी केले.

यावेळी पीसीईटीचे अध्यक्ष ज्ञानेश्वर लांडगे, उपाध्यक्षा पद्मा भोसले, सचिव विठ्ठल काळभोर, खजिनदार शांताराम गराडे, विश्वस्त तथा पीसीयुचे कुलपती हर्षवर्धन पाटील, उद्योजक नरेंद्र लांडगे, अजिंक्य काळभोर, कार्यकारी संचालक डॉ. गिरीश देसाई, पुणे बिझनेस स्कूलचे संचालक डॉ. गणेश राव, डॉ. मिनाक्षी त्यागी, अंजली गुगळे, राजू वाघमारे आदी उपस्थित होते.

महेश जयचंद बिंद्रा हे भारतीय वंशाचे असून ते न्यूझीलंड मध्ये राजकीय क्षेत्रात कार्यरत आहेत. त्यांनी २०१४ आणि २०१७ मध्ये न्युझीलंड संसदेत प्रतिनिधित्व केले. पीसीईटी आणि एनझेडबीसीसीआय शैक्षणिक करारामुळे विद्यार्थ्यांना जागतिक स्तरावरील उच्च दर्जाचे शिक्षण व रोजगार संधी उपलब्ध होणार आहेत. असे डॉ. गिरीश देसाई यांनी सांगितले. युरोपियन अभ्यास विभागाच्या प्रमुख डॉ. ऐश्वर्या गोपालकृष्णन यांनी स्वागत केले. डॉ. गणेश राव यांनी आभार मानले.