Agniveer Yojana | Haryana : हरियाणातील भाजप सरकारने विविध पदांच्या भरतीमध्ये अग्निवीरांसाठी १० टक्के आरक्षण जाहीर केले. प्रामुख्याने कॉन्स्टेबल, वनरक्षक आणि जेल वॉर्डन या पदांवर अग्निवीरांची वर्णी लागेल. हरियाणाचे मुख्यमंत्री नायबसिंह सैनी यांनी पत्रकार परिषदेत अग्निवीरांशी संबंधित विविध घोषणा केल्या.

राज्य सरकारच्या सेवेतील क आणि ड श्रेणीतील पदांसाठी अग्निवीरांना वयाबाबत ३ वर्षांची सवलत मिळेल. पहिल्या तुकडीतील अग्निवीरांसाठी वयोमर्यादेबाबत ५ वर्षांची सवलत मिळेल. व्यवसाय करू इच्छिणाऱ्या अग्निवीरांना ५ लाख रूपयांपर्यंतचे व्याजमुक्त कर्ज उपलब्ध केले जाईल.

अग्निवीरांना नोकरी देणाऱ्या औद्योगिक आस्थापनांना विशेष अनुदान दिले जाईल. अग्निवीराला दरमहा ३० हजार रूपयांपेक्षा अधिक वेतन देणाऱ्या औद्योगिक आस्थापनेला सरकार दरवर्षी ६० हजार रूपये अनुदान देईल. अग्निवीरांना प्राधान्यक्रमाने शस्त्र परवाना मिळेल.

केंद्र सरकारने लष्करी भरतीसाठी अग्निवीरांचा समावेश असणारी अग्निपथ योजना आणली. त्या योजनेवरून विरोधकांनी सातत्याने केंद्र सरकारला घेरले. तसेच, लोकसभा निवडणुकीवेळी संबंधित विषयाला प्रचाराचा मुद्दाही बनवले.

त्या योजनेबाबत लष्करी भरतीसाठी उत्सुक तरूण फारसे समाधानी नसल्याचेही दडून राहिले नाही. आता हरियाणातील विधानसभा निवडणूक जवळ येऊन ठेपली आहे. त्या पार्श्‍वभूमीवर, त्या राज्यातील भाजप सरकारने अग्निवीरांना दिलासा देण्यासाठी पाऊल उचलले आहे.