मोहाली -ईशान किशन, सूर्यकुमार यादव, तिलक वर्मा व टीम डेव्हिड यांनी केलेल्या वादळी फलंदाजीच्या जोरावर मुंबई इंडियन्सने आयपीएल स्पर्धेत बुधवारी झालेल्या सामन्यात पंजाब किंग्जचा 6 गडी राखून पराभव केला. संपूर्ण लढतीत मुंबईच्या फलंदाजांनीच वर्चस्व राखले. त्यातही ईशान किशन व सूर्यकुमारच्या फलंदाजीने पंजाबच्या गोलंदाजांची तारांबळ उडाली होती.

पंजाबने विजयासाठी दिलेल्या 215 धावांच्या आव्हानाचा पाठलाग करताना मुंबईच्या डावाची सुरुवात पुन्हा निराशाजनक झाली. कर्णधार रोहित शर्मा डावातील पहिल्याच षटकात बाद झाला. त्यानंतर कॅमेरून ग्रीनने ईशान किशनला साथ देत संघाला अर्धशतकी पल्ला पार करून दिला. ग्रीन 23 धावांवर परतला. त्याने 18 चेंडूत 4 चौकार फटकावले. यावेळी आलेल्या सूर्यकुमार यादवने आपल्या फलंदाजीने वादळ निर्माण केले. त्याने किशनच्या साथीत वेगाने धावा करत संघाचे शतक फलकावर लावले.

या दोघांनी आपापली अर्धशतके पूर्ण करताना संघाला दीडशतकी मजलही मारून दिली. अर्शदीप सिंगनेच जास्त धावा बहाल केल्या. मात्र, त्यानेच प्रचंड भरात असलेल्या सूर्यकुमारला तंबूचा रस्ता दाखवला. अनावश्‍यक फटका मारून सूर्यकुमार बाद झाला.

मात्र, त्यापूर्वी या जोडीने 116 धावांची बहुमोल भागीदारी केली. बाद होण्यापूर्वी सूर्यकुमारने आपल्या 66 धावांच्या खेळीत 31 चेंडूत 8 चौकार व 2 षटकार फटकावले. टीम डेव्हिड किशनला साथ देण्यासाठी खेळपट्टीवर आला. यावेळी किशनने अनावश्‍यक फटका मारत आपली विकेट बहाल केली. त्याने अवघ्या 41 चेंडूत 75 धावांची अफलातून खेळी करताना 7 चौकार व 4 षटकारांची आतषबाजी केली. त्यानंतर मात्र तिलक वर्माने टीम डेव्हिडसह डाव सावरला. त्यांना 18 चेंडूत 21 धावांची गरज होती.

या जोडीने पंजाबच्या गोलंदाजांची वाताहत करत आवश्‍यक धावा 7 चेंडूत व 6 गडी राखून हा सामना जिंकला. तिलक वर्मा 10 चेंडूत 1 चौकार व 3 षटकारांसह 26 धावांवर नाबाद राहिला. टीम डेव्हिड 10 चेंडूत 3 चौकारांसह 19 धावांवर नाबाद राहिला. पंजाबकडून नाथन एलिसने सर्वाधिक 2 गडी बाद केले.

तत्पूर्वी, लियाम लिव्हिंगस्टोन व जितेश शर्मा यांच्या आक्रमक फलंदाजीच्या जोरावर पंजाब किंग्जने मर्यादित 20 षटकांत 3 गडी गमावून 214 असा धावांचा डोंगर उभारला. एकवेळ 3 बाद 95 अशा बिकट स्थितीतून लिव्हिंगस्टोन व जितेशने संघाला सुस्थिती प्राप्त करून दिली.

मुंबईचा कर्णधार रोहित शर्माने नाणेफेक जिंकत पंजाबला पहिल्यांदा फलंदाजी दिली. प्रभसिमरन सिंगने यावेळी मात्र साफ निराशा केली. त्यानंतर कर्णधार शिखर धवनने मॅथ्यू शॉर्टच्या साथीत संघाचे अर्धशतक फलकावर लावले. धवन स्थिरावला असे वाटत असतानाच 20 चेंडूत 5 चौकारांच्या मदतीने 30 धावांवर परतला.

शॉर्टही आक्रमक खेळीही पियुष चावलाने संपुष्टात आणली. त्याने 26 चेंडूंचा सामना करताना 2 चौकार व 1 षटकार फटकावताना 27 धावा केल्या. यानंतर लियाम लिव्हिंगस्टोनने जितेश शर्माच्या साथीत संघाला शतकी पल्ला पार करून दिला. या जोडीने संघाचे दीडशतक फलकावर लावले.

दरम्यान, लिव्हिंगस्टोनने आपले अर्धशतक पूर्ण केले. त्याने यानंतर धावांचा वेग वाढवताना आक्रमक फलंदाजी केली. त्याने जितेशच्या साथीत संघाचे द्विशतकही पार केले. या जोडीने चौथ्या गड्यासाठी नाबाद 119 धावांची भक्‍कम भागीदारी केली. जितेशला मात्र अखेरच्या षटकात फारसा स्ट्राइक मिळाला नाही व तो अर्धशतक पूर्ण करू शकला नाही.
लिव्हिंगस्टोनने नाबाद 82 धावांची खेळी करताना 42 चेंडूत 7 चौकार व 4 षटकारांची आतषबाजी केली. जितेशने नाबाद 49 धावांच्या खेळीत 27 चेंडूत 5 चौकार व 2 षटकार फटकावले. मुंबईकडून पियुष चावलाने 2 तर अर्शद खानने 1 गडी बाद केला.

लक्षवेधी
प्रभसिमरन सिंग
साफ अपयशी
चांगल्या सुरुवातीनंतर धवनकडून निराशा
शॉर्टही अनावश्‍यक फटकेबाजीमुळे परतला
या दोघांना बाद करत चावलाने अडसर दूर केले
लिव्हिंगस्टोनचे
वादळी अर्धशतक
जितेश शर्माच्या
नाबाद 49 धावा
सुर्यकुमार व इशान किशनची वादळी फलंदाजी
दोघांचीही दमदार अर्धशतके
तिलक वर्मा व टीम डेव्हीडचीही उपयुक्त खेळी
रोहित शर्मा पुन्हा अपयशी

संक्षिप्त धावफलक
पंजाब किंग्ज – 20 षटकांत 3 बाद 214 धावा. (शिखर धवन 30, मॅथ्यू शॉर्ट 27, लियाम लिव्हिंगस्टोन नाबाद 82, जितेश शर्मा नाबाद 49, पियुष चावला 2-29, अर्शद खान 1-48). मुंबई इंडियन्स – 18.5 षटकांत 4 बाद 216 धावा. (ईशान किशन 75, सूर्यकुमार यादव 66, कॅमेरून ग्रीन 23, तिलक वर्मा नाबाद 23, टीम डेव्हिड नाबाद 19, नाथन एलिस 2-34).