Sunetra Pawar : ज्येष्ठ नेते शरद पवार गेल्या दोन दिवसांपासून मुंबईतील ब्रीच कँडी रुग्णालयात उपचार घेत आहेत. कफ आणि प्रचंड थकवा जाणवत असल्याने त्यांना रुग्णालयात दाखल करण्यात आले आहे. दरम्यान, पवार यांच्या प्रकृतीची विचारपूस करण्यासाठी विविध राजकीय पक्षांतील नेत्यांनी रुग्णालयात भेटी देण्यास सुरुवात केली आहे. त्यामुळे ब्रीच कँडी रुग्णालयात नेत्यांची वर्दळ वाढली आहे.

काल राष्ट्रवादी काँग्रेसचे ज्येष्ठ नेते प्रफुल्ल पटेल यांनी शरद पवार यांची रुग्णालयात भेट घेतली. यावेळी दोन्ही नेत्यांमध्ये जवळपास तासभर चर्चा झाल्याची माहिती आहे. विशेष म्हणजे, चर्चेदरम्यान शरद पवार यांनी ११ तारखेनंतर भेटू, असे पटेल यांना सांगितल्याचे समजते. त्यामुळे या भेटीमागील राजकीय अर्थाबाबत अनेक तर्क वितर्क लावले जात आहे.

अशातच आज राज्याच्या उपमुख्यमंत्री सुनेत्रा पवार यांनीही ब्रीच कँडी रुग्णालयात जाऊन शरद पवार यांची भेट घेतली. त्यांच्या प्रकृतीची विचारपूस करण्यासाठी सुनेत्रा पवार रुग्णालयात दाखल झाल्या आहेत. प्रफुल्ल पटेल यांच्या भेटीनंतर लगेचच सुनेत्रा पवार यांनी घेतलेल्या भेटीमुळे राजकीय वर्तुळाचे लक्ष या घडामोडीकडे लागले आहे.

दरम्यान, लोकसभेतील विरोधी पक्षनेते राहुल गांधी आणि काँग्रेस नेत्या प्रियांका गांधी यांनीही फोनद्वारे शरद पवार यांच्या प्रकृतीची विचारपूस केली आहे. तसेच माजी मुख्यमंत्री उद्धव ठाकरे यांनीदेखील शरद पवार यांच्याशी फोनवरून संपर्क साधत त्यांच्या तब्येतीची विचारणा केली.

मिळालेल्या माहितीनुसार, शरद पवार यांची प्रकृती आता स्थिर असून त्यांना आज रात्री किंवा उद्या सकाळी रुग्णालयातून डिस्चार्ज मिळण्याची शक्यता आहे. चार दिवसांपूर्वी शरद पवार यांना पुण्यातील रुबी हॉल क्लिनिकमध्ये दाखल करण्यात आले होते.

तेथे दोन दिवस उपचार घेतल्यानंतर त्यांना डिस्चार्ज देण्यात आला. त्यानंतर ते मुंबईतील सिल्व्हर ओक येथील निवासस्थानी परतले होते. मात्र, पुन्हा त्रास जाणवू लागल्यााने त्यांना ब्रीच कँडी रुग्णालयात दाखल करण्यात आले.

Aishwarya Rai Bachchan: ना गाऊन, ना भडक मेकअप! लाल साडीत ऐश्वर्या रायचा क्लासिक अंदाज