Ahaan Panday: ‘सैयारा’ या चित्रपटातून बॉलिवूडमध्ये दमदार पदार्पण करणारा अभिनेता अहान पांडे आता आपल्या दुसऱ्या चित्रपटासाठी सज्ज झाला आहे. पहिल्याच चित्रपटातून रोमँटिक हिरो म्हणून प्रेक्षकांची पसंती मिळवलेल्या अहानचा यावेळी पूर्णपणे वेगळा अंदाज पाहायला मिळणार आहे. तो एका बिग बजेट अॅक्शन-रोमान्स चित्रपटात मुख्य भूमिकेत झळकणार असून त्याच्यासोबत अभिनेत्री शर्वरी पहिल्यांदाच स्क्रीन शेअर करणार आहे.   (Ahaan Panday)

या चित्रपटाचे दिग्दर्शन अली अब्बास जफर करत असून निर्मितीची धुरा यशराज फिल्म्सचे प्रमुख आदित्य चोप्रा यांनी सांभाळली आहे. चित्रपटाचे नाव अद्याप जाहीर करण्यात आलेले नसले, तरी त्याच्या प्रदर्शनाची तारीख निश्चित करण्यात आली आहे. हा चित्रपट २६ मार्च २०२७ रोजी देशभरातील चित्रपटगृहांमध्ये प्रदर्शित होणार आहे.  (Ahaan Panday)

अहान आणि शर्वरीची ही फ्रेश जोडी प्रेक्षकांसाठी मोठे आकर्षण ठरणार आहे. दोघेही पहिल्यांदाच एकत्र काम करत असल्याने त्यांच्या ऑनस्क्रीन केमिस्ट्रीबद्दल चाहत्यांमध्ये उत्सुकता आहे. रोमँससोबतच दमदार अॅक्शन आणि मोठ्या प्रमाणावर चित्रीकरण करण्यात येणार असल्याची चर्चा आहे.  (Ahaan Panday)

 

 

या चित्रपटात बॉबी देओल आणि ऐश्वर्य ठाकरे यांच्याही महत्त्वाच्या भूमिका आहेत. विशेष म्हणजे, ऐश्वर्य ठाकरे या चित्रपटात खलनायकाच्या भूमिकेत दिसणार आहेत. चित्रपटात त्यांचा आणि अहान पांडेचा जबरदस्त अॅक्शन सामना पाहायला मिळणार असल्याचे सांगितले जात आहे. त्यामुळे या चित्रपटातील अॅक्शन सीन्सकडे चाहत्यांचे विशेष लक्ष लागले आहे.

अली अब्बास जफर आणि आदित्य चोप्रा यांची जोडी याआधीही अनेक यशस्वी चित्रपट देऊन प्रेक्षकांची मने जिंकली आहे. ‘मेरे ब्रदर की दुल्हन’, ‘गुंडे’, ‘सुलतान’ आणि ‘टायगर जिंदा है’ यांसारख्या चित्रपटांनंतर हा त्यांचा पाचवा एकत्रित प्रकल्प आहे. त्यामुळे या चित्रपटाकडूनही मोठ्या अपेक्षा व्यक्त केल्या जात आहेत.   (Ahaan Panday)

मार्च २०२७ हा महिना बॉक्स ऑफिससाठी खूपच रंगतदार ठरणार आहे. ५ मार्च रोजी सलमान खानचा वामशी पैडीपल्ली दिग्दर्शित चित्रपट आणि प्रभासचा ‘स्पिरिट’ प्रदर्शित होणार आहे. त्यानंतर १९ मार्चला ‘फोर्स ३’ प्रेक्षकांच्या भेटीला येणार आहे. अशा परिस्थितीत २६ मार्चला अहान पांडेचा हा चित्रपट प्रदर्शित होत असल्याने बॉक्स ऑफिसवरील स्पर्धा आणखी चुरशीची होण्याची शक्यता आहे.   (Ahaan Panday)

‘सैयारा’च्या यशानंतर अहान पांडेला बॉलिवूडमधील नव्या पिढीतील आश्वासक अभिनेता म्हणून पाहिले जात आहे. त्यामुळे त्याच्या दुसऱ्या चित्रपटाकडेही चाहत्यांचे आणि चित्रपटसृष्टीचे लक्ष लागले आहे. दुसरीकडे, शर्वरीसाठीही हा महत्त्वाकांक्षी प्रकल्प ठरणार आहे. मोठ्या बॅनरखाली, मोठ्या कलाकारांसोबत काम करण्याची ही तिच्यासाठी मोठी संधी मानली जात आहे.

रोमँस, अॅक्शन, नव्या जोडीची उत्सुकता आणि ऐश्वर्य ठाकरे यांची खलनायकाची भूमिका या सर्व गोष्टींमुळे या चित्रपटाची चर्चा आतापासूनच सुरू झाली आहे. चित्रपटाचे शीर्षक आणि पहिली झलक कधी समोर येणार, याची चाहत्यांना उत्सुकता आहे. मात्र, २६ मार्च २०२७ रोजी प्रदर्शित होणारा हा चित्रपट प्रेक्षकांच्या अपेक्षा कितपत पूर्ण करतो, हे पाहणे औत्सुक्याचे ठरणार आहे.