Actor Prakash Raj – मतदार यादीतून नावे वगळल्यामुळे ज्या मतदारांनी पुन्हा समावेशासाठी अर्ज केले आहेत, अशा ३८ लाख मतदारांची प्रकरणे पश्चिम बंगालमधील न्यायाधिकरणांकडे प्रलंबित आहेत. त्या निकालासाठी १०-१२ वर्षे लागू शकतात.

इतक्या मोठ्या संख्येने असलेल्या अर्जदारांनी इतका काळ वाट पाहावी का? कर्नाटक, आंध्र प्रदेश आणि संपूर्ण भारतात गणेश विसर्जन झाले आहे. आता ज्ञानेश कुमार यांचे विसर्जन बाकी आहे, अशा शब्दांत अभिनेते प्रकाश राज यांनी मुख्य निवडणूक आयुक्त ज्ञानेश कुमार यांच्यावर टिका केली.

पत्रकार परिषदेत बोलताना प्रकाश राज म्हणाले की, एसआयआर प्रक्रिया सुरू झाली तेव्हा ती माहिती अद्ययावत किंवा स्वच्छ करण्याची प्रक्रिया असल्याचे सांगण्यात आले होते;

परंतु ती सर्वांना सामावून घेणारी नसून केवळ नावे वगळणारी प्रक्रिया असल्याचे दिसून आले आहे. निवडणुका म्हणजे केवळ आकडेवारी नसून त्या देशातील जिवंत नागरिकांशी निगडीत आहेत.

प्रकाश राज पुढे म्हणाले की, लोकांना भेटण्यासाठी मी विविध जिल्ह्यांचा १० दिवसांचा दौरा केला आणि त्यादरम्यामला सांगण्यात आले की, केवळ बूथ लेव्हल ऑफिसर घरी आले असताना संबंधित व्यक्ती घरी उपस्थित नव्हती, या कारणास्तव त्यांची नावे मतदार यादीतून वगळण्यात आली होती.

कामासाठी इतरत्र गेलेल्या रोजंदारीवर काम करणाऱ्या मजुरांची नावेही मतदार यादीतून वगळण्यात आली आहेत. मन की बात कार्यक्रम घेणारे पंतप्रधान नरेंद्र मोदी यांनी या प्रक्रियेबद्दल आधीच स्पष्टीकरण दिले होते का, असा प्रश्नही त्यांनी उपस्थित केला.

भाजपाची तक्रार दाखल.!

दरम्यान, एका घटनात्मक संस्थेचे प्रमुख असलेल्या मुख्य निवडणूक आयुक्तांविरुद्ध अपमानजनक टिप्पणी केल्याबद्दल तेलंगणा भाजपचे मुख्य प्रवक्ते एन. व्ही. सुभाष यांनी या अभिनेत्यावर कडक टीका केली.

प्रकाश राज यांना निवडणूक आयोगावर टीका करण्याचा अधिकार असू शकतो, परंतु मुख्य निवडणूक आयुक्तांची तुलना मूर्ती विसर्जनाशी करणे ही केवळ राजकीय टीका न राहता घटनात्मक संस्थेचा अनादर करण्याची कृती ठरते. लोकशाहीत चर्चेला वाव असतो, उपहासाला नाही.