Cockroach Janata Party Pune – केंद्रीय शिक्षण मंत्री धर्मेंद्र प्रधान यांच्या राजीनाम्याच्या मागणीवर कॉक्रोच जनता पार्टी (सीजेपी) ठाम आहे. आता त्या मागणीसाठी सीजेपी ११ जूनला पुण्यात आंदोलन करणार आहे. सीजेपीचा संस्थापक अभिजीत दिपके याने सोमवारी सोशल मीडियावरून पुण्यातील आंदोलनाविषयीची घोषणा केली.

महाराष्ट्राची शैक्षणिक राजधानी असणाऱ्या पुण्यात आम्ही प्रधान यांच्या राजीनाम्याची मागणी करू, असे त्याने नमूद केले. त्यामुळे आंदोलनाची व्याप्ती वाढवण्यासाठी सीजेपी सज्ज झाल्याचे सूचित होत आहे.

सीजेपीने सर्वप्रथम दिल्लीतील जंतर-मंतर परिसरात ६ जूनला आंदोलन केले. ते लक्षवेधी ठरले. दिल्लीतील आंदोलनानंतर सीजेपीने प्रधान यांच्या राजीनाम्यासाठी ७ दिवसांची मुदत दिली.

ती मागणी पूर्ण होईपर्यंत आंदोलन चालूच ठेवण्याचा आणि आंदोलनाची व्याप्ती देशभर वाढवण्याचा इशारा सीजेपीने दिला. त्यानंतर रविवारी दिपके याने पत्रकार परिषदेत भूमिका मांडली.

विविध परीक्षांमधील गोंधळाबद्दल प्रधान यांनी राजीनामा द्यायला हवा. त्यांचा राजीनामा घेणे ही पंतप्रधान नरेंद्र मोदी यांची जबाबदारी आहे. ते पेपरफुटी का थांबवू शकत नाहीत, असा सवाल त्याने केला.