मुंबई : भारतीय जाहिरात उद्योगातील दिग्गज, एक उत्कृष्ट कॉपीरायटर आणि मास कम्युनिकेशन गुरु तारा सिन्हा यांचे वयाच्या 88 व्या वर्षी मुंबईत निधन झाले. मात्र आपल्या कामगिरीने त्यांनी जाहिरात क्षेत्रात अमीट असा ठसा उमटवला आहे, हे नक्की.

जाहिरात, जनसंपर्क, परराष्ट्र व्यवहार, इश्‍युज मॅनेजमेंट आणि कॉर्पोरेट कम्युनिकेशन्स या क्षेत्रातील त्या ज्येष्ठ व्यक्ती होत्या आणि इंग्लंड, भारत आणि अमेरिकेत 50 वर्षांचा अनुभव होता. फास्ट मुव्हींग कन्झ्युमर गुडस अर्थात एफएमसीजी मार्केटींगच्या त्यांच्या अनेक संकल्पना कोकाकोलासारख्या दिग्गज कंपनीने वापरल्या होत्या.

इंडियन इन्स्टिट्यूट ऑफ मास कम्युनिकेशन, नवी दिल्लीच्या त्या अध्यक्षा होत्या आणि आयआयटी, दिल्ली सल्लागार समिती सदस्य, तसेच ऍडव्हर्टायझिंगमधील अनेक कंपन्यांसाठी त्यांनी सल्लागार म्हणून काम केले होते. “असोचॅम’च्या अध्यक्ष होत्या.

धनबादमधील चिरंजीवलाल आणि सीता पसरिचा या सुखवस्तू दाम्पत्याची कन्या असलेल्या तारा यांनी विशीच्या उंबरय्‌ावर असताना इंग्लंडमध्ये जाहिरात व जनसंपर्क पदविकेचे शिक्षण घेतले होते. वर्ष 1954 मध्ये त्या डी. जे. केमर या जाहिरात कंपनीत नोकरीनिमित्त कोलकात्यासही गेल्या. परंतु वर्षभरातच या कंपनीने भारतातील कारभार गुंडाळण्याचे ठरविले, तेव्हा तारा आणि सहकाऱ्यांनीही स्वत:ची जाहिरात कंपनी सुरु केली.

चांगली संधी म्हणून वर्ष 1973 मध्ये त्यांना कोका कोला एक्‍स्पोर्ट कॉर्पोरेशनच्या भारतातील कार्यालयात काम करण्याची तारा यांना संधी मिळाली होती. पण तत्कालीन जनता पक्षाच्या सरकारने 1977 साली या अमेरिकी पेयावर बंदी घातली. तारा यांच्यासह काही वरिष्ठांना कंपनीने अमेरिकेत काम करण्याचा प्रस्ताव दिला. तो स्वीकारून तारा ऍटलांटा येथे गेल्या.

तेथील कामाने आपणास आंतरराष्ट्रीय अनुभव दिला, असे त्या आवर्जून सांगत.
केवळ भारतातच नव्हे तर संपूर्ण जगात जाहिरात आणि मार्केटींग क्षेत्रातही त्या अग्रणी होत्या. त्यांना आदराने “जाहिरात गुरु’ असे संबोधने जायचे.