छत्रपती संभाजीनगर‎ : जगभरात लॉर्ड ऑफ वॉर म्हणून ओळखल्या जाणाऱ्या वादग्रस्त आर्म डीलर अभिषेक वर्मा याने शिंदे गटात प्रवेश केला आहे. या अभिषेक वर्मावर भाजपचे ज्येष्ठ नेते लालकृष्ण आडवाणी आणि भाजपने गंभीर आरोप केले होते. त्यावरून आता विधान परिषदेतील विरोधी पक्षनेते अंबादास दानवे यांनी भाजप व शिंदे गटाला फटकारले आहे.

शिवसेना ठाकरे पक्षाचे नेते अंबादास दानवे यांनी सोशल मीडियावर पोस्ट केली आहे. दानवेंनी लिहिले आहे की, शस्त्र व्यापार विश्वात ज्यावर मागे मोठे आरोप झाले असा अभिषेक वर्मा हा शिंदे गटात गेला आणि तो राष्ट्रीय समन्वयकही झाला. मुळात वर्मावर 2006 साली आज शिंदेंचे छत्र असलेल्या भारतीय जनता पक्षाने त्यावर मोठे आरोप केले होते.

या आरोपानंतर वर्माने भाजपचे ज्येष्ठ नेते लाल कृष्ण अडवाणी यांच्यावर खटलादेखील भरला होता. मग आज अमित शाह आणि देवेंद्र फडणवीस हे अडवणींवर भरलेला हा खटला विसरले आहेत की अभिषेक वर्मा हा माणूस त्यांच्या स्मरणातून गेला. म्हणून की काय भाजपची उपशाखा असलेल्या शिंदे गटात वर्मा सारखे लोक प्रवेश करतात आणि पदही मिळवत आहेत. असे असेल तर लाल कृष्ण अडवाणी यांच्या लढ्याला आज भाजपच्या लेखी शून्य महत्व राहिले आहे, असे दानवे म्हणाले.