Nushrratt Bharuccha : बॉलिवूड अभिनेत्री नुशरत भरुचा हिच्याबाबत चिंताजनक बातमी समोर आली आहे. कामानिमित्त आणि सुट्टीसाठी बालीला गेलेल्या नुशरतचा दुर्दैवी अपघात झाला.

या अपघातात तिच्या मणक्याला फ्रॅक्चर झालं असून सध्या तिच्यावर बालीतील रुग्णालयात उपचार सुरू आहेत. नुशरतला डॉक्टरांच्या देखरेखीखाली ठेवण्यात आलं असून तिच्या प्रकृतीवर सातत्याने लक्ष ठेवण्यात येत आहे.

नुशरतच्या अपघाताची माहिती समोर आल्यानंतर तिच्या चाहत्यांमध्ये चिंतेचं वातावरण निर्माण झालं. दरम्यान, अभिनेत्रीच्या पब्लिसिस्टकडून तिच्या प्रकृतीबाबत अधिकृत निवेदन जारी करण्यात आलं आहे.

त्यानुसार, नुशरत बालीमध्ये वर्क-कम-हॉलिडे ट्रिपवर असताना अपघातग्रस्त झाली आणि तिच्या मणक्याला फ्रॅक्चर झालं. सध्या ती बालीतील रुग्णालयात दाखल असून डॉक्टर तिच्यावर वैद्यकीय देखरेख ठेवत आहेत.

नुशरतच्या उपचारांबाबत तिच्या टीमने महत्त्वाची माहिती दिली आहे. डॉक्टरांकडून पुढील वैद्यकीय तपासणी आणि मूल्यांकन केल्यानंतर तिच्यावर स्पाइन सर्जरी करण्यात येणार आहे.

सध्या तिच्या प्रकृतीला सर्वाधिक प्राधान्य देण्यात आलं असून आवश्यक वैद्यकीय उपचार आणि डॉक्टरांची देखरेख यावर लक्ष केंद्रित करण्यात आलं आहे.

नुशरतला पुढील उपचारांसाठी बालीहून मुंबईत आणण्याची तयारी तिच्या टीमकडून सुरू आहे. एअर ॲम्ब्युलन्सच्या माध्यमातून तिला मुंबईत आणण्यात येणार असून त्यानंतर डॉक्टरांच्या देखरेखीखाली तिच्या मणक्याची शस्त्रक्रिया केली जाईल, अशी माहिती अधिकृत निवेदनात देण्यात आली आहे.

दरम्यान, नुशरतला झालेली दुखापत आणि त्यानंतर होणारी शस्त्रक्रिया यामुळे तिला पूर्णपणे बरे होण्यासाठी वेळ लागणार आहे. त्यामुळे आगामी काही आठवड्यांतील तिच्या कामाच्या वेळापत्रकावर परिणाम होण्याची शक्यता असल्याचं तिच्या टीमने स्पष्ट केलं आहे.

चाहत्यांना आणि माध्यमांना खास विनंती…

नुशरतच्या अपघाताची बातमी समोर आल्यानंतर तिचे चाहते आणि इंडस्ट्रीतील कलाकार तिच्या प्रकृतीबाबत चिंता व्यक्त करत आहेत. या पार्श्वभूमीवर तिच्या टीमने चाहत्यांसह माध्यमांना नुशरत आणि तिच्या कुटुंबाच्या गोपनीयतेचा आदर करण्याचं आवाहन केलं आहे.