मुंबई : केंद्रीय मंत्री रक्षा खडसे यांच्या मुलीसह काही मुलींची संत मुक्ताई यात्रेमध्ये टवाळखोरांनी छेडछाड केल्याचा प्रकार समोर आला. या प्रकरणात एकूण पाच जणांवर पोक्सो अंतर्गत कारवाई करण्यात आली असून अनिकेत भोई या आरोपीला ताब्यात घेण्यात आले आहे. या प्रकरणावर मुख्यमंत्री देवेंद्र फडणवीस यांनी आरोपी हे एका विशिष्ट पक्षाचे कार्यकर्ते असल्याचे म्हटले आहे.

त्यानंतर आता राष्ट्रवादी शरद पवार गटाच्या महिला प्रदेशाध्यक्षा रोहिणी खडसे यांनी आरोपी शिंदे गटाचे आमदार चंद्रकांत पाटील यांचे कार्यकर्ते असल्याचा दावा केला आहे. एफआयआरमधे नाव असलेले अनिकेत भोई, पियूष मोरे यांचे आमदार चंद्रकांत पाटील आणि उपमुख्यमंत्री एकनाथ शिंदे यांच्या सोबतचे फोटो सोशल मिडियावर व्हायरल झाले आहेत. त्यामुळे राजकीय वर्तुळात एकच खळबळ उडाली आहे.

रोहिणी खडसे यांनी एका मराठी वृत्तवाहिनीशी सवांद साधला. त्या म्हणाल्या, देवेंद्र फडणवीस यांनी त्यांच्या वक्तव्यात असे म्हटले आहे की, आरोपी एका विशिष्ट पक्षाचे आहेत. त्यानंतर हे फोटो सोशल मीडियावर व्हायरल होत आहेत. आरोपींचे एकनाथ शिंदे यांच्या सोबत फोटो आहेत. मला देवेंद्र फडणवीस यांचे आभार व्यक्त करायचे आहेत की, आरोपी सत्ताधारी पक्षाचे जरी कार्यकर्ते असले तरी त्यांनी कारवाईचे आदेश दिले आहेत. मात्र, कारवाईचे आदेश देण्यापेक्षा लवकरात लवकर त्या मुलींना न्याय देण्यासाठी आणि भविष्यात अशा घटना घडू नये, यासाठी देखील देवेंद्र फडणवीस यांनी महाराष्ट्रातील पोलीस अधिकाऱ्यांना सूचना करणे अपेक्षित आहे, असं रोहिणी खडसे म्हणाल्या.

पुढे बोलताना म्हणाल्या, सत्ताधारी पक्षाच्या आमदारांचे कार्यकर्त्यांची जर अशा छेडखानीच्या प्रकरणात नावे येत असतील. तर देवेंद्र फडणवीस यांनी कारवाई करण्याचे आदेश दिले हे स्वागतार्ह आहे. पण कडक कारवाई करणे अपेक्षित आहे. कदाचित सत्ताधारी पक्षाचे कार्यकर्ते आहेत, असे त्यांना उघडपणे मान्य करायचे नसेल. पण त्यांनी इतकं तरी मान्य केले की ते विशिष्ट पक्षाचे कार्यकर्ते आहेत. आणि त्यांच्यावर कडक कारवाई झाली पाहिजे, यासाठी देवेंद्र फडणवीस यांचे कौतुकच करायला हवे, असंही रोहिणी खडसे यांनी म्हटले आहे.

आमदार चंद्रकांत पाटील काय म्हणाले?

केंद्रीय मंत्री रक्षा खडसे यांच्या मुलीची छेड काढण्याच्या प्रकाराबाबत बोलताना आमदार चंद्रकांत पाटील म्हणाले की, जो कोणी या घटनेत आरोपी असेल, त्याला मी पाठिशी घालणार नाही. तो व्यक्ती माझा कार्यकर्ता जरी असेल तरीही मी त्याला पाठीशी घालणार नाही. त्याला कठोर शिक्षा झाली पाहिजे. त्याला फाशी द्या. परंतु मतदार संघात कुठलीही घटना घडली म्हणजे एकनाथ खडसे आणि त्यांच्या कुटुंबियांकडून माझ्यावर टीका केली जाते.

रक्षा खडसेंनी फोनवरुन एका कार्यकर्त्याला झापलं

पियुष, तुमच्या जुन्या गावामध्ये त्या पोरांनी कृषिकाचा व्हिडिओ काढला अन् तुम्ही त्याला सपोर्ट करता. दोनवेळा तसं झालं ना, हे बघ मी तिथं आले ना धिंगाणा करेन, ती माझी पोरगीय, अशा शब्दात व्हिडिओ काढणाऱ्या टवाळखोरांच्या मित्राशी खासदार रक्षा खडसे यांनी फोनवरुन संवाद साधत इशारा दिला. रक्षा खडसे आणि या घटनेतील टवाळखोरांचा मित्र असलेल्या पियुष यांच्यातील संवादाची ऑडिओ क्लीप व्हायरल झाली आहे

या क्लिपमध्ये रक्षा खडसेंनी आई म्हणून मुलीची छेडछाड करणाऱ्या टवाळखोरांबद्दल तीव्र शब्दात भावना व्यक्त केल्या आहेत. ती माझी मुलगी होती, तिच्या सुरक्षेसाठीच मी त्या लोकांना तिथं ठेवलंय. तुम्ही फक्त त्या आमदाराचे पाय चाटायला तिथ बसलेले आहेत. ते आमदाराचेच लोकं होते ना, असेही रक्षा खडसे यांनी म्हटले आहे.

रक्षा खडसेंनी फोनवरुन एका कार्यकर्त्याला झापलं

पियुष, तुमच्या जुन्या गावामध्ये त्या पोरांनी कृषिकाचा व्हिडिओ काढला अन् तुम्ही त्याला सपोर्ट करता. दोनवेळा तसं झालं ना, हे बघ मी तिथं आले ना धिंगाणा करेन, ती माझी पोरगीय, अशा शब्दात व्हिडिओ काढणाऱ्या टवाळखोरांच्या मित्राशी खासदार रक्षा खडसे यांनी फोनवरुन संवाद साधत इशारा दिला. रक्षा खडसे आणि या घटनेतील टवाळखोरांचा मित्र असलेल्या पियुष यांच्यातील संवादाची ऑडिओ क्लीप व्हायरल झाली आहे

या क्लिपमध्ये रक्षा खडसेंनी आई म्हणून मुलीची छेडछाड करणाऱ्या टवाळखोरांबद्दल तीव्र शब्दात भावना व्यक्त केल्या आहेत. ती माझी मुलगी होती, तिच्या सुरक्षेसाठीच मी त्या लोकांना तिथं ठेवलंय. तुम्ही फक्त त्या आमदाराचे पाय चाटायला तिथ बसलेले आहेत. ते आमदाराचेच लोकं होते ना, असेही रक्षा खडसे यांनी म्हटले आहे.