पुणे : महाराष्ट्र संघटित गुन्हेगारी नियंत्रण कायद्यांतर्गत दाखल गुन्ह्यात तब्बल दोन वर्षांपासून फरार असलेल्या आरोपीला अखेर आंबेगाव पोलिसांनी अटक केली आहे. ही कारवाई १ जुलै २०२५ रोजी दुपारी करण्यात आली. आरोपी सुनिल संजय गायकवाड ( २०, रा. सच्चाईमाता नगर, दुगड शाळेजवळ, आंबेगाव खुर्द, पुणे) हा भारती विद्यापीठ पोलीस स्टेशन गु.र.नं. ७९८/२०२३ अंतर्गत गुन्ह्यात पाहिजे होता. त्याच्यावर भादंवि कलम ३१५, ३२६, १४३, १४७, १४९, ५०४, ५०६(२) तसेच क्रिमिनल लॉ अमेंडमेंट कायदा कलम ७ व मोक्का कायदा कलम ३(१)(११), ३(२), ३(४) अंतर्गत गंभीर आरोप होते. पोलिस अंमलदार पेट्रोलिंग दरम्यान हद्दीत गस्त घालत असताना, पो.अं. चेतन गोरे यांना मिळालेल्या खात्रीशीर माहितीच्या आधारे आरोपी हा आपल्या मित्राला भेटण्यासाठी राहत्या घराजवळ आल्याचे समजले. तत्काळ कारवाई करत तपास पथकाने त्या ठिकाणी धाव घेऊन आरोपीला अटक केली. त्यानंतर पोलिस ठाण्यात आणून चौकशी केली असता, त्याने गुन्ह्याची कबुली दिली. या गुन्ह्याचा तपास सहायक पोलीस आयुक्त, स्वारगेट विभाग यांच्याकडे सुरू आहे. कारवाईत आंबेगाव पोलीस स्टेशनचे वरिष्ठ पोलीस निरीक्षक शरद झिने, पोलीस निरीक्षक (गुन्हे) गजानन चोरमले, पोलीस उपनिरीक्षक मोहन कळमकर यांच्यासह पोलीस कर्मचारी शैलेंद्र साठे, चेतन गोरे, हणमंत मासाळ, निलेश जमदाडे, धनाजी धोत्रे, सचिन गाडे, प्रमोद भोसले, नितीन कातुर्डे, योगेश जगदाळे, सुभाष मोरे, हरिश गायकवाड, अजय कामठे, ज्ञानेश्वर चित्ते यांच्या पथकाने सहभाग घेतला. आरोपीच्या अटकेमुळे परिसरातील नागरिकांमध्ये पोलिसांबद्दल विश्वास वाढला असून, आंबेगाव पोलीस स्टेशनच्या या कामगिरीचे सर्वत्र कौतुक होत आहे.
