शिरूर : सामान्य माणसाच्या आयुष्यभराच्या कष्टाची पुंजी सुरक्षित राहावी, या विश्वासाने टपाल कार्यालयात मुदतठेवी ठेवल्या जातात. मात्र, याच विश्वासाला तडा देणारा धक्कादायक प्रकार शिरूर तालुक्यातील गोलेगाव येथे शाखा टपाल कार्यालयात उघडकीस आला आहे.

खातेदारांकडून मुदतठेवींच्या नावाखाली स्वीकारलेली तब्बल १५ लाख ४४ हजार रुपयांची रक्कम शासकीय खात्यात जमा न करता बनावट पासबुक, खोट्या नोंदी आणि अधिकृत शिक्क्यांचा वापर करून अपहार केल्याचे समोर आले आहे. या प्रकरणी शिरूर पोलीस ठाण्यात गुन्हा दाखल झाल्याने परिसरात खळबळ उडाली आहे.

राजेश जबा खुडे (वय ५६, रा. रांजणगाव गणपती, ता. शिरूर, जि. पुणे) असे गुन्हा दाखल झालेल्या आरोपीचे नाव आहे. केडगाव (ता. दौंड) येथील बारामती टपाल विभागाच्या पूर्व उपविभागाचे सहायक अधीक्षक शशिकांत सिंग (वय ४५) यांनी याबाबत फिर्याद दिली आहे.

गोलेगाव शाखा टपाल कार्यालयातील काही खातेदारांनी त्यांच्या मुदतठेवींच्या रकमेबाबत टपाल विभागाकडे तोंडी तसेच लेखी तक्रारी केल्या होत्या. या तक्रारींमुळे टपाल कार्यालयाच्या कामकाजाची तपासणी सुरू करण्यात आली. तपासणीदरम्यान गंभीर आर्थिक अनियमितता समोर आल्याचे फिर्यादीत नमूद आहे.

आरोपी राजेश खुडे शाखा टपाल कर्मचारी म्हणून कार्यरत असताना रवींद्र कोंडीबा थेरुकर, योगिता रवींद्र थेरुकर, मोहन शंकर रसाळ, पांडुरंग भगवान वाखारे यांच्यासह अन्य खातेदारांकडून मुदतठेवींसाठी रोख रक्कम स्वीकारल्याचे तपासात निष्पन्न झाल्याचे सांगण्यात आले.

मात्र, पैसे स्वीकारल्यानंतर संबंधित खातेदारांना स्वतःच्या हस्ताक्षरातील बनावट खाते क्रमांक आणि व्यवहारांच्या नोंदी असलेली पासबुके देण्यात आली. या पासबुकांवर टपाल कार्यालयाचे अधिकृत शिक्के मारण्यात आल्याचा आरोप आहे. त्यामुळे खातेदारांचा विश्वास संपादन झाला; पण प्रत्यक्षात स्वीकारलेली रक्कम शासकीय खात्यात जमा न करता तिचा स्वतःच्या फायद्यासाठी वापर केल्याचा संशय या प्रकरणातून पुढे आला आहे.

१५ लाख ४४ हजार रुपयांची रक्कम शासकीय खात्यात जमा न झाल्याचा गुन्हा दाखल झाल्याने या प्रकरणाची व्याप्ती आणि कालावधी याबाबत सखोल तपास होणे आवश्यक आहे. किती खातेदारांची फसवणूक झाली, आणखी किती रकमेचा अपहार झाला आहे का, तसेच संबंधित व्यवहारांच्या नोंदी आणि पासबुकांची पडताळणी केल्यानंतर आणखी काही बाबी समोर येतात का, असे प्रश्न उपस्थित होत आहेत.

टपाल कार्यालयात सामान्य नागरिक आपली बचत सुरक्षित राहील, या अपेक्षेने पैसे जमा करतात. अशा ठिकाणीच बनावट नोंदींच्या आधारे आर्थिक गैरव्यवहार झाल्याने प्रकरण खुपर गंभीर बनले आहे. त्यामुळे खातेदारांच्या ठेवींची वस्तुस्थिती स्पष्ट करून त्यांना त्यांच्या पैशांबाबत अधिकृत माहिती देणे आणि नुकसान झाल्याचे निष्पन्न झाल्यास नियमानुसार पुढील कार्यवाही करणे महत्त्वाचे ठरणार आहे.

या प्रकरणी बनावट दस्तऐवज, खोट्या नोंदी आणि आर्थिक फसवणुकीच्या आरोपांवरून राजेश खुडे याच्याविरुद्ध शिरूर पोलीस ठाण्यात गुन्हा दाखल करण्यात आला आहे. पोलीस निरीक्षक विनोद पाटील यांच्या मार्गदर्शनाखाली पोलीस उपनिरीक्षक सागर शेळके पुढील तपास करीत आहेत.

आता या प्रकरणातील सर्व खातेदारांच्या ठेवींचे लेखापरीक्षण, बनावट पासबुकांची पडताळणी आणि अपहार झालेल्या रकमेचा संपूर्ण तपशील तपासातून समोर येणे आवश्यक आहे. खातेदारांच्या कष्टाच्या पैशांचे नेमके काय झाले, याचे उत्तर तपासातून मिळणार का, याकडे गोलेगावसह परिसरातील नागरिकांचे लक्ष लागले आहे.