“यात खोटं वाटण्यासारखं काय आहे? खरंच नाही माहीत मला!’ भिशीसाठी जमलेल्या महिलांमधल्या एकीचा मैत्रिणींना कन्व्हिन्स करायचा प्रयत्न बराच वेळ सुरू होता आणि मैत्रिणी काही तिच्यावर विश्‍वास ठेवायला तयार नव्हत्या. पतीची इतकी महत्त्वाची गोष्ट पत्नीला माहीत नसणं शक्‍यच नाही, असं सगळ्यांचं पक्‍कं मत होतं. सबब “माहीत नाही’ म्हणणारी मैत्रिण आपल्यापासून काहीतरी लपवतेय, अशी शंका सर्वजणींना होती.

असं काय विचारलं होतं मैत्रिणींनी? भिशीच्या पैशांची जुळणी करण्यासाठी आपल्याला दरमहा कशी कसरत करावी लागते, हे संबंधित महिला सांगत होती आणि तिथून सुरू झालेला विषय थेट नवऱ्याच्या पगारावर जाऊन पोहोचला होता. संबंधित महिलेला पतीचा पगार सांगता आला नाही आणि त्यावरून सगळ्यांनी तिच्यावर अविश्‍वास दाखवून टिंगलटवाळी सुरू केली होती. संबंधित महिलेनंही मैत्रिणींचे टोमणे हसतखेळत झेलले; पण घरी जाताना तिचं चित्त थाऱ्यावर नव्हतं.

आपल्या पतीला किती पगार मिळतो हेही आपल्याला ठाऊक नाही, याचं दुःख तिला प्रथमच एवढ्या तीव्रतेनं जाणवलं होतं. स्कूटी चालवता-चालवता तिच्या मनात येत होतं… माझ्यासारखी एक तरी स्त्री असेल का? पगाराचा विषय निघाला की नवरा नेहमी टाळाटाळ का करतो? मी हाउसवाइफ आहे म्हणून? पण म्हणून काय झालं? मला हक्‍कच नाही का नवऱ्याचा पगार माहीत करून घेण्याचा? मी कमावती असते तर परिस्थिती वेगळी दिसली असती का?

हळूहळू एकीला दोघी, दोघींना चौघी भेटत गेल्या आणि कालांतरानं त्या महिलेला समजून चुकलं, की आपण एकमेव नाही. बरेच नवरे बायकोला पगाराचा आकडा सांगत नाहीत किंवा चुकीचा सांगतात. काही नवऱ्यांना तर “पगार किती,’ हा प्रश्‍नही खपत नाही… आपल्यासारखं कुणीतरी आहे, हे पाहून ती सुखावत असतानाच समोर पडलेला पेपर तिला वेगळंच काहीतरी सांगत होता… इंग्लंडच्या केली स्कूल ऑफ बिझनेसनं केलेल्या अभ्यासाची बातमी वाचताना तिच्या मनात आलं,

हे परदेशी लोक नेहमी चित्रविचित्र सर्व्हे करतात आणि तितकेच चित्रविचित्र निष्कर्ष काढतात. म्हणूनच बहुतेक यांचे अहवाल येतात आणि जातात. कुणीच ढुंकून बघत नाही यांच्या निष्कर्षाकडे..! काय तर म्हणे, नवरा-बायकोचं बॅंकेत जॉइंट अकाउंट! कसं शक्‍य आहे? तिने पुढं वाचलं, जॉइंट अकाउंट असेल तर नवरा-बायकोच्या आर्थिक व्यवहारांमध्ये पारदर्शकता राहते. मग म्हणे त्यांच्यात भांडणं कमी होतात आणि त्यांचं नातं बरीच वर्षे टिकतं. संशोधकांनी काही जोडप्यांना जॉइंट अकाउंट काढायला सांगितलं आणि काही जोडप्यांना वेगवेगळी..! हे वाचून ती मनातल्या मनात पुटपुटली, “म्हणजे भांडणं लावायला यांनी इथेच सुरुवात केली.’

ज्यांची स्वतंत्र अकाउंट्‌स होती, त्या तुलनेत जॉइंट अकाउंटवाली जोडपी अधिक सुखी आढळली, असा संशोधकांचा निष्कर्ष! पण मुळात नवरा-बायकोचं बॅंकेत जॉइंट अकाउंट असू शकतं, हेच तिला काही केल्या पटेना. मोबाइलचा पासवर्ड विचारला म्हणून एकमेकांवर खेकसणारे नवरा-बायको जॉइंट अकाउंट कसं काढतील? ती विचार करू लागली… पारदर्शकतेमुळे संसार सुखाचे होतात हे खरंय; पण आपण तर भिशी सुरू केल्याचंही नवऱ्याला सांगितलेलं नाही! सांगायला हवं का? खरंच इतकी पारदर्शकता शक्‍य आहे?