Abhishek Sharma Record : इंदूरमध्ये अभिषेक शर्माने उडवला धुरळा! अवघ्या इतक्या चेंडूंत २ हजार धावा ठोकत मोडला सूर्याचा वर्ल्ड रेकॉर्ड
Abhishek Sharma Record : अभिषेक शर्माने नवीन विश्वविक्रम प्रस्थापित केला आहे. वेस्ट इंडिजविरुद्ध खेळताना त्याने सूर्यकुमार यादवचा विक्रम मोडला. तो ३० चेंडूंमध्ये ६९ धावा करून बाद झाला.
Abhishek Sharma Fastest 2000 T20I Runs Balls World Record Indore IND vs WI 3rd T20I : इंदूरच्या होळकर स्टेडियमवर भारत आणि वेस्ट इंडिज दरम्यान खेळल्या जात असलेल्या तिसऱ्या टी-२० सामन्यात भारताचा सलामीवीर अभिषेक शर्माने (Abhishek Sharma) आंतरराष्ट्रीय क्रिकेटमध्ये नवा इतिहास रचला आहे. मैदानात येताच चौफेर टोलेबाजी करणाऱ्या अभिषेकने टी-२० मध्ये चेंडूंच्या हिशोबाने सर्वात जलद २,००० धावा पूर्ण करण्याचा विश्वविक्रम आपल्या नावे केला आहे. या डावात ३३ वी धाव पूर्ण करताच त्याने भारताचाच ‘मिस्टर ३६०’ सूर्यकुमार यादवचा (Suryakumar Yadav) विक्रम मोडत जागतिक क्रमवारीत अव्वल स्थान पटकावले.
१०२४ चेंडूंत २ हजार धावा; सूर्या, मॅक्सवेल आणि फिंचला टाकले मागे!
अभिषेक शर्माने आंतरराष्ट्रीय टी-२० मध्ये २ हजार धावांचा टप्पा गाठण्यासाठी अवघ्या १,०२४ चेंडूंचा सामना केला. यापूर्वी हा विक्रम सूर्यकुमार यादवच्या नावावर होता, ज्याने १,१६४ चेंडूंत ही कामगिरी केली होती. या यादीत ऑस्ट्रेलियाचा माजी कर्णधार ॲरॉन फिंच (१,२८३ चेंडू) तिसऱ्या, ग्लेन मॅक्सवेल (१,३०४ चेंडू) चौथ्या, हार्दिक पांड्या (१,३९० चेंडू) पाचव्या आणि न्यूझीलंडचा टिम सेइफर्ट (१,३९५ चेंडू) सहाव्या स्थानावर फेकला गेला आहे.
अवघ्या १८ चेंडूंत तुफानी अर्धशतक; शामार जोसेफच्या चेंडूवर पराक्रम!
The Abhishek Sharma Show in Indore! 🤩
He brings up a scintillating 18-ball 5️⃣0️⃣ 🔥
#TeamIndia 87/1 after just 6 overs.
Updates ▶️ https://t.co/0ve4uDWSIn
#INDvWI | @mflone_ | @OfficialAbhi04 https://t.co/Uu4QRXiYrF
— BCCI (@BCCI) October 11, 2026
अभिषेकने केवळ विश्वविक्रमच नोंदवला नाही, तर विंडीजच्या गोलंदाजांची दाणादाण उडवत अवघ्या १८ चेंडूंत आपले अर्धशतक पूर्ण केले. शामार जोसेफच्या चेंडूवर दोन धावा घेत त्याने या मालिकेतील आपले पहिले वादळी अर्धशतक ठोकले. वेस्ट इंडिजविरुद्ध आंतरराष्ट्रीय टी-२० मध्ये हे संयुक्तपणे तिसरे सर्वात वेगवान अर्धशतक ठरले आहे. या विक्रमात क्विंटन डी कॉक (१५ चेंडू) आणि टिम डेव्हिड (१६ चेंडू) आघाडीवर आहेत, तर डेव्हिड वॉर्नर आणि कॉलिन मुनरो यांनीही १८ चेंडूंत अशी कामगिरी केली होती.
एका कॅलेंडर वर्षात ६८ षटकार; सूर्याच्या ऐतिहासिक विक्रमाशी बरोबरी!
षटकारांच्या विक्रमातही अभिषेकने खळबळ उडवून दिली आहे. एका कॅलेंडर वर्षात सर्वाधिक आंतरराष्ट्रीय टी-२० षटकार मारण्याच्या सूर्यकुमार यादवच्या (२०२२ मधील ६८ षटकार) विक्रमाशी त्याने बरोबरी साधली. अभिषेकने २०२६ मध्ये आतापर्यंत ६८ षटकार ठोकले असून तो आता संयुक्तपणे पहिल्या स्थानावर पोहोचला आहे. विशेष म्हणजे २०२५ मध्येही त्याने ५४ षटकार ठोकले होते.
