Smriti Mandhana Appointed UNICEF India Celebrity Advocate Sachin Tendulkar Wishes : भारतीय महिला क्रिकेट संघाची नवनियुक्त कर्णधार स्मृती मानधना (Smriti Mandhana) हिच्या शिरपेचात आणखी एक मानाचा तुरा रोवला गेला आहे. आंतरराष्ट्रीय बालिका दिनाचे औचित्य साधून ‘युनिसेफ इंडिया’ने (UNICEF India) स्मृतीची ‘सेलिब्रिटी ॲडव्होकेट’ (Celebrity Advocate) म्हणून अधिकृत घोषणा केली आहे. मुलींचे हक्क, सुरक्षितता, नेतृत्वगुण आणि त्यांच्यातील क्षमतांना व्यासपीठ मिळवून देण्यासाठी स्मृती आता मैदानावरील बॅटसोबतच सामाजिक स्तरावरही महत्त्वाची भूमिका बजावताना दिसणार आहे.

“प्रत्येक स्वप्नाची सुरुवात संधीने होते”; नियुक्तीनंतर स्मृती भावुक!

या सन्मानाबद्दल आनंद व्यक्त करताना स्मृती म्हणाली की, “युनिसेफ इंडियाच्या या मोहिमेचा भाग होताना मला अत्यंत अभिमान वाटत आहे. क्रिकेट खेळत मोठी झाल्यामुळे मला याची पूर्ण जाणीव आहे की प्रत्येक मोठ्या स्वप्नाची सुरुवात एका संधीने होते. कठोर परिश्रम, जिद्द आणि योग्य पाठिंब्यामुळे ती संधी ऐतिहासिक ठरू शकते. प्रत्येक मुलीला आणि तरुणाला मोठी स्वप्ने पाहण्याचा आणि स्वतःची क्षमता सिद्ध करण्याचा पूर्ण अधिकार मिळाला पाहिजे.”

सचिन तेंडुलकरकडून स्वागत; “मुलांच्या हक्कांसाठी तुझा आवाज बुलंद ठरेल!”

Welcome to the @UNICEFIndia family, @mandhana_smriti! You inspire millions on the field, and I know you will be a brilliant voice for children’s rights off it.

— Sachin Tendulkar (@sachin_rt) October 11, 2026

युनिसेफचे दक्षिण आशियाई प्रादेशिक राजदूत आणि क्रिकेटचे महानायक सचिन तेंडुलकरने (Sachin Tendulkar) एक्सवर पोस्ट करत स्मृतीचे स्वागत केले. सचिनने लिहिले की, “स्मृती मानधना, युनिसेफ इंडिया परिवारात तुझे मनःपूर्वक स्वागत. तू मैदानावर लाखो लोकांना प्रेरित करतेस आणि मला पूर्ण खात्री आहे की, मैदानाच्या बाहेरही मुलांच्या हक्कांसाठी तुझा आवाज अत्यंत बुलंद ठरेल.”

हेही वाचा – Hardik Pandya Birthday : “वयाच्या १९ वर्षांपर्यंत फक्त फलंदाज होता हार्दिक, मग एका मॅचने बदलले नशीब”, वाढदिवशी गर्लफ्रेंडची हृदयस्पर्शी पोस्ट

१० हजार आंतरराष्ट्रीय धावा अन् डब्ल्यूपीएल चॅम्पियन कर्णधार!

६ ऑक्टोबर रोजी हरमनप्रीत कौरने कर्णधारपद सोडल्यानंतर बीसीसीआयने स्मृतीकडे भारतीय संघाचे नेतृत्व सोपवले होते. २०१३ मध्ये आंतरराष्ट्रीय पदार्पण करणाऱ्या स्मृतीने तिन्ही प्रकारांत मिळून १० हजारांहून अधिक धावा कुटल्या आहेत. तिच्या नेतृत्वाखाली रॉयल चॅलेंजर्स बंगळुरूने (RCB) २०२४ आणि २०२६ मध्ये महिला प्रीमियर लीगचे (WPL) विजेतेपद पटकावले आहे. आता भारतीय संघाच्या नेतृत्वापाठोपाठ तिच्यावर ही जागतिक जबाबदारी आली आहे.