Umesh Mhetre : जगदीप धनखड यांनी आपला उपराष्ट्रपती पदाचा राजीनामा दिल्यानंतर आता उपराष्ट्रपती पदासाठी निवडणूक होणार आहे. या निवडणुकीत एनडीएने महाराष्ट्राचे राज्यपाल सीपी राधाकृष्णन यांना उमेदवारी दिली आहे. तर इंडिया आघाडीकडून माजी न्यायाधीश बी सुदर्शन रेड्डी यांनी उमेदवारी अर्ज दाखल केला आहे. अशातच आता पुण्यातील एका तरुणाने चक्क उपराष्ट्रपतीच्या निवडणुकीत उडी घेत उमेदवारी अर्ज दाखल केला आहे. त्यामुळे या तरुणाची मोठी चर्चा सध्या होताना दिसत आहे. उमेश म्हेत्रे असं या तरुणाचे नाव असून त्याने दिल्लीत संसद भवनात जात उपराष्ट्रपदासाठी उमेदवारी अर्ज दाखल केला आहे. शेवटच्या दिवशी तरुणाने उमेदवारी अर्ज दाखल केला आहे. हा तरुण दौंड तालुक्यातील सहजपूर गावचा रहिवाशी आहे. राज्यसभेच्या दालनात निवडणूक निर्णय अधिकारी पी.सी मोदी आणि गिरीमा जैन यांच्याकडे उमेश म्हेत्रे याने आपला उमेदवारी अर्ज दाखल केला आहे. यानंतर आता एका साध्या तरुणाने थेट उपराष्ट्रपती पदासाठी उमेदवारी अर्ज दाखल केल्याने सर्वांनाच आश्चर्याचा धक्का बसला आहे. उपराष्ट्रपती पदाच्या निवडणुकीत अर्ज दाखल करण्याची पात्रात काय असते? उमेदवार हा भारताचा नागरिक असावा. सरकारी लाभ देणारे पद त्याच्याकडे नसावे अथवा तो सरकारी नोकरी करणार नसावा. त्याचे किमान वय 35 वर्ष पूर्ण असावे. उमेदवार हा राज्यसभा निवडणुकीसाठी पात्र असावा. विधानपरिषदेच्या निवडणुकीतही भरला होता उमेदवारी अर्ज पण…. मात्र, उमेश म्हत्रे याने उमेदवारी अर्ज दाखल केला असला तरी त्याचा अर्ज तांत्रिक कारणांमुळे बाद होण्याची शक्यता आहे. उमेश यांनी याअगोदर विधान परिषदेच्या निवडणुकीसाठी देखील उमेदवारी अर्ज दाखल केला होता. मात्र, नियमानुसार उमेदवारी अर्जावर अनुमोदक म्हणून दहा आमदारांच्या सह्या आवश्यक असल्याने त्याचा उमेदवारी अर्ज बाद करण्यात आला होता. हेही वाचा : संसदेच्या सुरक्षेत आणखी एक चूक! भिंतीवरून उडी मारून आत घुसला अज्ञात व्यक्ती, सुरक्षा दलांनी घेतले ताब्यात
