बारामतीत रहदारीच्या रस्त्यावर उलटला ट्रक
जळोची- बारामती शहरातील बालक मंदिर शाळे समोर युरिया वाहतूक करणारा ट्रक( एम. डब्ल्यू. के ०६१३) चेंबरमध्ये रुतून उलटला. रुतून जाग्यावरच उलटल्याने पुढील अनर्थ टळला. सुदैवाने या घटनेत कोणालाही इजा झाली नाही. लोकवस्तीतीत सदर घटना घडल्याने रहिवासी घाबरून गेले आहेत.
बारामती शहरातील भिगवण चौकानजीक बालक मंदिर शाळेसमोर आज सकाळी दहाच्या सुमारास येथील एका गोडाऊनमध्ये युरिया उतरविण्यासाठी ट्रक आला होता. मात्र रस्त्यात मोडकळीस आलेल्या चेंबरमध्ये अवजड ट्रकचे चाक रुतले व चेंबर खचला.
चेंबरमध्ये चाक रूतल्याने ट्रक एका बाजूला कलंडला अगदी काही फुटांवरच याठकाणी घरे आहेत. शिवाय या रस्त्यावरून मोठी रहदारी होत असते. ट्रकचे चाक रुतून जागेवरच कलंडल्याने सुदैवाने पुढील अनर्थ टळला.
दरम्यान येथील रहिवासी गिरीश दळवी यांनी बारामती नगरपालिकेकडे नुकतीच येथील चेंबर खचून मोठा खड्डा पडल्याने तो दुरुस्त करण्यासाठी अर्ज केला होता. पालिकेकडून तीन दिवसांपूर्वीच सदर चेंबरची डागडुजी करण्यात आली होती.
