प्रभात वृत्तसेवा शिक्रापूर – करंजेनगर भागात राहणाऱ्या एका महिलेच्या घरातून सव्वा तीन तोळे वजनाचे दागिने चोरीला गेल्याची घटना समोर आली आहे. घराला कडी लावून काही वेळ खाली गेलेल्या सुप्रिया शंकर शिवले (वय ३५) यांच्या घरातून अज्ञात चोरट्याने सोफ्यामध्ये ठेवलेले दागिने लंपास केले आहेत. या प्रकरणी शिक्रापूर पोलिसात अज्ञात व्यक्तीविरुद्ध गुन्हा दाखल करण्यात आला आहे. सुप्रिया शिवले घटनेच्या वेळी खालच्या मजल्यावर राहणाऱ्या त्यांच्या मैत्रिणीकडे गेल्या होत्या. काही वेळाने सुप्रिया पुन्हा घरी आल्या आणि सोफ्यामध्ये ठेवलेले दागिने घालण्यासाठी शोधू लागल्या. मात्र, तिथे ठेवलेले सव्वा तीन तोळे वजनाचे सोन्याचे गंठण आणि कानातील टॉप्स गायब असल्याचे त्यांच्या निदर्शनास आले. याबाबत सुप्रिया शिवले यांनी दिलेल्या फिर्यादीवरून शिक्रापूर पोलिसांनी अज्ञातावर गुन्हा नोंदवला आहे. भरवस्तीत झालेल्या या चोरीच्या घटनेमुळे परिसरात खळबळ उडाली असून, पोलीस हवालदार विश्वांबर वाघमारे या प्रकरणाचा पुढील तपास करत आहेत.
