Ashutosh Rana : हिंदी चित्रपटसृष्टीतील दमदार आवाज, भारदस्त व्यक्तिमत्त्व आणि प्रभावी संवादफेक यामुळे अभिनेता आशुतोष राणा यांनी प्रेक्षकांच्या मनात वेगळे स्थान निर्माण केले आहे. खलनायकाच्या भूमिकांपासून ते गंभीर व्यक्तिरेखांपर्यंत प्रत्येक भूमिकेला त्यांनी आपल्या अभिनयाने खास ओळख दिली. आज १० नोव्हेंबर रोजी आशुतोष राणा यांचा वाढदिवस आहे. यानिमित्ताने त्यांच्या आयुष्यातील एक रंजक किस्सा जाणून घेऊयात.

आशुतोष राणा यांचा जन्म १० नोव्हेंबर १९६७ रोजी मध्य प्रदेशातील गदरवारा येथे झाला. त्यांच्या नावामागे एक खास गोष्ट दडलेली आहे. एका मुलाखतीत त्यांनी स्वतः याबाबतचा किस्सा सांगितला होता. लहानपणी घरातील मंडळी त्यांना ‘राणाजी’ या नावाने हाक मारायची. मात्र, वयाच्या साडेतीन वर्षांपर्यंत त्यांचे अधिकृत नाव ठेवण्यात आले नव्हते.

एकदा त्यांच्या घरी भगवान शिवाची पूजा आयोजित करण्यात आली होती. पूजेदरम्यान पुजारी मंत्रोच्चार करत असताना त्यांच्या तोंडून ‘ओम आशुतोषाय नमः’ हा मंत्र ऐकू आला. या मंत्रातील ‘आशुतोष’ हा शब्द बालपणीच्या आशुतोष राणा यांना खूप आवडला. त्यांनी लगेच पुजाऱ्याला या शब्दाचा अर्थ विचारला. त्यावर आशुतोष म्हणजे भगवान शिवाचे एक नाव असून, सहज प्रसन्न होणारा असा त्याचा अर्थ असल्याचे पुजाऱ्याने सांगितले.

हा अर्थ समजल्यानंतर त्यांना हे नाव इतके आवडले की त्यांनी थेट आईकडेच आपल्या नावाची इच्छा व्यक्त केली. ‘आजपासून माझे नाव आशुतोष असेल,’ असे त्यांनी आईला सांगितले. अशा प्रकारे अवघ्या साडेतीन वर्षांच्या वयात त्यांनी स्वतःचे नाव स्वतःच निवडले.

लहानपणापासूनच अभिनयाची आवड

आशुतोष राणा यांना लहानपणापासूनच अभिनय आणि रंगभूमीची विशेष आवड होती. वयाच्या अवघ्या चौथ्या वर्षी त्यांनी पहिल्यांदा रंगमंचावर पाऊल ठेवले. स्थानिक रामलीलेमध्ये त्यांनी सहभाग घेतला होता. विशेष म्हणजे, त्यांना रावणाची भूमिका साकारायला खूप आवडायचे. अभिनयाची हीच आवड पुढे त्यांना नॅशनल स्कूल ऑफ ड्रामापर्यंत घेऊन गेली. दिल्लीतील या प्रतिष्ठित संस्थेतून त्यांनी अभिनयाचे प्रशिक्षण घेतले.

त्यानंतर अभिनयक्षेत्रात करिअर करण्यासाठी ते मुंबईत आले. येथे त्यांना महेश भट्ट यांच्या ‘स्वाभिमान’ या मालिकेत काम करण्याची संधी मिळाली. छोट्या पडद्यावर स्वतःची ओळख निर्माण केल्यानंतर १९९८ मध्ये ‘दुश्मन’ या चित्रपटातून त्यांनी हिंदी चित्रपटसृष्टीत पदार्पण केले.

या चित्रपटातील त्यांच्या मनोरुग्ण मारेकऱ्याच्या भूमिकेने प्रेक्षकांच्या अंगावर अक्षरशः काटा आणला. त्यानंतर ‘संघर्ष’ चित्रपटातील लज्जा शंकर पांडे ही व्यक्तिरेखा विशेष गाजली. या दोन्ही भूमिकांमुळे त्यांची ओळख प्रभावी खलनायक म्हणून निर्माण झाली.

‘गुलाम’, ‘जानवर’, ‘राज’, ‘अब के बरस’ आणि ‘हासिल’ यांसारख्या चित्रपटांमधून त्यांनी आपल्या अभिनयाची ताकद दाखवून दिली. पुढे ‘कलयुग’, ‘आवारापन’ आणि ‘सोनचिरिया’ यांसारख्या चित्रपटांतून त्यांनी वेगवेगळ्या छटा असलेल्या भूमिका साकारल्या. ‘सिम्बा’ आणि ‘पठाण’ यांसारख्या चित्रपटांतूनही ते प्रेक्षकांच्या भेटीला आले.

Pimpri-Chinchwad : महाविकास आघाडीकडून नवीन सहकारी शासन निर्णयाची होळी