Sonali Bendre : अ‍ॅमेझॉन प्राइम व्हिडिओची आगामी वेब सीरिज ‘राख’ प्रदर्शित होण्यापूर्वीच चर्चेचा विषय ठरली आहे. ‘पाताल लोक’चे दिग्दर्शक प्रोसित रॉय यांच्या दिग्दर्शनाखाली तयार झालेली ही वेबसिरीज देशाला हादरवून सोडणाऱ्या रंगा-बिल्ला प्रकरणावर आधारित असल्याचे समोर आले आहे. नुकताच या वेबसिरचा प्रदर्शित झालेला ट्रेलर प्रेक्षकांना एका भयावह गुन्हेगारी जगात घेऊन जातो.

ट्रेलरची सुरुवात 1970 च्या दशकातील दोन मुलांच्या बेपत्ता होण्याच्या घटनेपासून होते. सुरुवातीला साधे अपहरण वाटणारे हे प्रकरण पुढे एका धक्कादायक खून-रहस्यात रूपांतरित होते. या गुन्ह्याच्या तपासादरम्यान अनेक धक्कादायक खुलासे समोर येतात.

सगळ्यात महत्वाची गोष्ट म्हणजे या वेबसिरीजमधून 90 च्या दशकातील आपल्या सहजसुंदर अभिनयाने प्रेक्षकांच्या मनाचा ठाव घेणारी प्रसिद्ध अभिनेत्री सोनाली बेंद्रे कमबॅक करत आहे. खरंतर सोनालीने अनेक चित्रपटांमध्ये काम केले असून, ती पहिल्यांदाच वेबसिरीजमध्ये झळकणार आहे. ट्रेलरमध्ये तिच्या पात्राची झलक दाखवण्यात आली आहे.

हेही वाचा : Cesarean Delivery: भारतात सिझेरियन प्रसूतींचे प्रमाण का वाढतेय? तज्ज्ञांनी सांगितली महत्त्वाची कारणे

‘मोना अरोरा’ या शाळेतील शिक्षिकेच्या भूमिकेत ती दिसणार असून आमिर बशीर ‘लेफ्टनंट कर्नल अशोक अरोरा’ यांची भूमिका साकारत आहेत. त्यांच्या दोन मुलांचे अचानक बेपत्ता होणे हीच कथानकाची मुख्य सुरुवात आहे. त्यांचे अपहरण झाले असून त्यांच्यासोबत नेमकं काय घडलं आहे याचा उलघडा सिरीजमध्ये बघायला मिळणार आहे. ही वेबसिरीज सत्यघटनेवर आधारित आहे.

दरम्यान, अभिनेता अली फजल त्याच्या नेहमीपेक्षा वेगळ्या भूमिकेतून चाहत्यांच्या भेटीला येणार आहे. एसआय जयप्रकाश जाटव या पोलीस अधिकाऱ्याच्या भूमिकेत तो दिसणार आहे. तपासाची जबाबदारी त्याच्यावर येते आणि त्यानंतर उलगडत जाणारे गुन्हेगारी जाळे प्रेक्षकांची उत्कंठा वाढवते.

ट्रेलरमध्ये दाखवण्यात आलेल्या घटनांमधून हा केवळ तपासाचा प्रवास नसून मानवी स्वभाव, भीती आणि संघर्ष यांचीही कथा असल्याचे स्पष्ट होते. या वेबसिरीजवर बोलताना अली फजलने सांगितले की, ही कथा केवळ गुन्ह्याचा तपास नाही, तर मानवी भावनांचा आणि मानसिकतेचा वेध घेणारी कहाणी आहे. तर सोनाली बेंद्रेने ‘मोना अरोरा’ची भूमिका तिच्या कारकिर्दीतील सर्वाधिक आव्हानात्मक भूमिकांपैकी एक असल्याचे म्हटले आहे.

70 च्या दशकातील वातावरण, वास्तववादी मांडणी आणि सत्य घटनेवर आधारित कथानकामुळे ‘राख’ ही वेब सीरिज प्रेक्षकांसाठी एक वेगळा आणि थरारक अनुभव ठरणार आहे. ही वेबसिरीज 12 जून या दिवशी अ‍ॅमेझॉन प्राइम व्हिडिओवर स्ट्रीम करण्यात येणार आहे.

हेही वाचा : Sanjay Raut : “सामाजिक कार्यकर्ते अण्णा हजारे यांनी दिल्लीत जाऊन या झुरळांना पाठिंबा द्यावा”; संजय राऊत