पुणे :– पोर्शे कार अपघातानंतर पुणे शहरातील पब कल्चर देशभर चर्चेत आल्यानंतर पोलीस, महापालिका आणि जिल्हा प्रशासनाने पब आणि बार रेस्टॉरंटवर कारवाईचा धडाका लावला. मात्र, यानंतरही रात्री उशिरापर्यंत उघडे राहणारे पब आणि नियमांचे उल्लंघन हे विषय चर्चेत येतात. आता मात्र पब कल्चरने हद्दच केली असून, एका पबने नववर्षासाठी आयोजित पार्टीच्या निमंत्रणात सोबत चक्क कंडोम आणि ओआरएसचे पाकीट पाठवले असल्याने खळबळ उडाली आहे.

महाराष्ट्र प्रदेश युवक काँग्रेस (प्रसारमाध्यम विभाग) अध्यक्ष अक्षय जैन यांनी थेट पोलीस आयुक्तांकडे तक्रार केली आहे. तक्रार अर्जात म्हटले आहे की, “पुण्यातील मुंढवा येथील हाय स्पिरिट कॅफे या रेस्टॉरंट कम पबने नववर्षानिमित्ताने नियमित ग्राहक असलेल्या तरुणांना निमंत्रणे पाठवताना कंडोमच्या पाकिटांसह इलेक्ट्रा ओआरएस वितरित केले आहे.  हे कृत्य पुणे शहराच्या शैक्षणिक आणि सांस्कृतिक परंपरेला न शोभणारे आहे.”

अशा कृतींमुळे तरुणांमध्ये चुकीचे संदेश पोहोचण्याची भीती असून, समाजात गैरसमज आणि चुकीच्या सवयी रुजण्याचा धोका आहे. पुणे हे देशाचे शैक्षणिक व सांस्कृतिक केंद्र म्हणून ओळखले जाते. त्यात पब्लिसिटीच्या नावाखाली केल्या जाणाऱ्या अशा कृत्यांमुळे शहराच्या प्रतिमेला तडा जातो. आम्ही पुणे शहरातील युवकांच्या वतीने या प्रकाराला कडाडून विरोध करतो. याची योग्य ती चौकशी करून, कॅफे व्यवस्थापनाविरुद्ध कठोर कारवाई करावी.

पुणेकरांसाठी मोठी बातमी ! नववर्ष स्वागतासाठी पुण्यातील वाहतुकीत बदल, ‘हे’ रस्ते असणार बंद

दरम्यान, यासंदर्भात पब प्रशासनाशी संपर्क साधला असता, आमच्या 2025 च्या “सुरक्षा आणि उत्सव” या थीमशी सुसंगतपणे, आमच्या आमंत्रित पाहुण्यांसाठी तयार केलेल्या गिफ्ट पिशव्यांमध्ये, पार्टीसाठी आवश्यक गोष्टींचा समावेश होता. यात ध्वनीनिर्मिती करणारे साधन, कंफेटी बॉम्ब, इलेक्ट्रोलाइट पॅकेट, कंडोम, आणि पाहुण्यांना मद्यपान करून वाहन चालवू नये यासाठी एक चालक कंपनीचा संपर्क क्रमांक देखील आहे. गिफ्ट पिशवीमध्ये कंडोमचा समावेश हा पूर्णपणे सुरक्षित आणि जबाबदार वर्तनाच्या प्रोत्साहनासाठी करण्यात आला होता. हे राष्ट्रीय एड्स नियंत्रण संघटनेच्या उपक्रमांशी सुसंगत आहे