Lifestyle : नवीन वर्षाचं स्वागत बहुतांश लोक पार्टी आणि खाण्यापिण्यात रमून करतात. ३१ डिसेंबरची रात्र असो किंवा नववर्षाचा पहिला दिवस… तळले-भाजलेले पदार्थ, जंक फूड आणि गोडधोड खाल्लं जातं. उत्साहात किती खाल्लं याचं भान राहत नाही आणि त्यामुळे ओव्हरईटिंग होते. याचा परिणाम दुसऱ्याच दिवशी पोटावर दिसून येतो पोट जड वाटणं, गॅस, अॅसिडिटी, छातीत जळजळ, पोट फुगणं किंवा अपचन अशा तक्रारी सुरू होतात. मात्र अशा वेळी घाबरण्याची गरज नाही. वेळेवर पोटाला आराम दिला तर ही समस्या लवकर कमी होऊ शकते. महागडी औषधं घेण्यापेक्षा काही सोपे घरगुती उपाय खूप प्रभावी ठरू शकतात. १) कोमट पाणी प्या ओव्हरईटिंगनंतर सर्वात आधी कोमट पाणी पिणं फायदेशीर ठरतं. यामुळे पचनासाठी आवश्यक एन्झाइम्स सक्रिय होतात आणि पोटातील जडपणा कमी होतो. गॅस बाहेर पडण्यासही मदत होते. २) ओवा घ्या ओव्यातील थायमॉल घटक पचन सुधारतो आणि गॅस-अॅसिडिटी कमी करतो. अर्धा चमचा ओवा कोमट पाण्यासोबत घेतल्यास पोटदुखी व सूज कमी होते. ३) बडीशेप खा किंवा बडीशेपचा काढा प्या बडीशेप पचनसंस्थेला शांत करते. त्यातील फायबर आणि अँटिऑक्सिडंट्समुळे पोटफुगी व गॅस कमी होतो. म्हणूनच जेवणानंतर बडीशेप खाण्याची सवय उपयुक्त मानली जाते. ४) आल्याचा वापर करा आल्यामध्ये दाह कमी करणारे गुणधर्म असतात. त्यामुळे पोटातील जळजळ, मळमळ कमी होते. थोडं आलं चावणं किंवा आल्याचा चहा पिणं पचनक्रिया वेगवान करतं. ५) थोडंसं चाला जेवणानंतर लगेच झोपण्याऐवजी १०-१५ मिनिटं चाला. यामुळे पचन सुधारतं आणि गॅस होण्याची शक्यता कमी होते. हलकी वॉक अपचन आणि रक्तातील साखर नियंत्रणात ठेवण्यासही मदत करते. नववर्षाच्या सेलिब्रेशननंतर पोट बिघडलं असेल, तर हे साधे घरगुती उपाय नक्कीच उपयोगी ठरू शकतात.
