मॉस्को – जोपर्यंत अमेरिका वास्तववादी आहे तोपर्यंत अमेरिकेसोबत इराणच्या अणु कार्यक्रमावर करार करणे शक्य आहे, असे इराणचे परराष्ट्र मंत्री अब्बास अरघाची यांनी म्हटले आहे. अमेरिकेने जर हेतूबद्दल गंभीर असल्याचे दाखवले आणि अवास्तव मागण्या केल्या नाहीत, तर करार करणे शक्य आहे, असे ते म्हणाले.

रशियामध्ये आल्यावर रशियाचे परराष्ट्र मंत्री सर्गेई लावरोव्ह यांच्याशी अरघाची यांची अणू कराराच्या वाटाघाटींसंदर्भात चर्चा झाली. त्यानंतर घेतलेल्या पत्रार परिषदेत त्यांनी आपली भूमिका स्पष्ट केली. गेल्या आठवड्यात ओमानमध्ये झालेल्या करारावरील पहिल्या फेरीच्या चर्चेत इराणने अमेरिकेचे गांभीर्य लक्षात घेतले होते, असे अराघची म्हणाले.

गेल्या काही दिवसांपासून अमेरिकेच्या विविध अधिकाऱ्यांकडून परस्परविरोधी भूमिका मांडल्या जात आहेत. ते लक्षात घेता अमेरिकन बाजूने प्रथम या संदर्भात स्पष्टीकरण द्यावे आणि त्यांच्या हेतू आणि गांभीर्याबद्दल निर्माण झालेली संदिग्धता दूर करावी, अशी अपेक्षा इराणी परराष्ट्र मंत्रालयाच्या प्रवक्त्यानेही व्यक्त केली आहे.

शनिवारी झालेली चर्चा सकारात्मक आणि विधायक होती, असे अमेरिकेचे विशेष दूत स्टीव्ह विटकॉफ आणि इराणचे परराष्ट्र मंत्री अब्बास अरघाची यांनीही म्हटले आहे. मात्र या चर्चेतल्या तपशीलाबद्दल कोणाकडूनही काहीही माहिती देण्यात आलेली नाही.