Pune Ganeshotsav 2025 : आज गणेशोत्सवाच्या पार्श्वभूमीवर पुण्यनगरीत सकाळपासूनच उत्साहाचे वातावरण पाहायला मिळत आहे. पुण्यातील श्रीमंत दगडूशेठ हलवाई गणपती मंडळाच्या मिरवणुकीला सुरूवात झाली आहे. दरवर्षीप्रमाणे यंदाही पारंपारिक पद्धतीने वाद्यनाच्या गजरात या गणपती मंडळाच्या मिरवणुकीला प्रारंभ झाला आहे. मोरया मोरयाच्या गजरात अवघा मंदिर परिसर दुमदुमला.

आकर्षक फुलांच्या रथातून दगडूशेठ गणपतीची मिरवणूकीला सुरुवात झाली आहे. मंडळाकडून यंदा केरळच्या पद्नाभ मंदिराची प्रतिकृती साकारण्यात आली आहे. मुख्य मंदिरातून उत्सव मंडपात मूर्ती विराजमान होणार आहे. मूर्ती उत्सव मंडपात विराजमान झाल्यावर केली प्राणप्रतिष्ठा केली जाणार आहे.

‘दगडूशेठ’ च्या श्री पद्मनाभ स्वामी मंदिर सजावटीचे उद्घाटन बुधवारी (दि.२७) श्रीमंत दगडूशेठ हलवाई सार्वजनिक गणपती ट्रस्ट ; अनंत श्री विभूषित जगद्गुरु श्री रामानुजाचार्य श्री झालरिया पीठाधीश्वर श्री श्री १००८ प.पू. स्वामी घनश्यामाचार्य महाराज (चित्रकुट, मध्यप्रदेश) यांच्या हस्ते श्रीं ची प्राणप्रतिष्ठापना करण्यात येणार आहे. तर मंदिरावरील विद्युतरोषणाईचे उद्घाटन सायंकाळी ७ वाजता होईल, अशी माहिती ट्रस्टचे अध्यक्ष सुनील रासने यांनी पत्रकार परिषदेत दिली होती.

यंदाचे श्रीमंत दगडूशेठ हलवाई सार्वजनिक गणपती ट्रस्ट, सुवर्णयुग तरुण मंडळ ट्रस्टचे १३३ वे वर्ष आहे. भारतातील केरळ राज्याची राजधानी असलेल्या तिरुअनंतपुरम येथे भगवान विष्णूंना समर्पित असे एक हिंदू मंदिर म्हणजे पद्मनाभस्वामी मंदिर. हे मंदिर श्री वैष्णव परंपरेत श्री विष्णूंचे पवित्र निवासस्थान मानले जाणारे १०८ दिव्य देसमांपैकी म्हणजेच निवास स्थानांपैकी एक आहे. अत्यंत पवित्र असलेल्या या मंदिराची तेजस्वी प्रतिकृती यंदाच्या गणेशोत्सवात साकारण्यात येत आहे.