Indonesia Fire : इंडोनेशियाची राजधानी जकार्ता येथे मंगळवारी एक दुःखद घटना घडली आहे. येथील सात मजली कार्यालयीन इमारतीला लागलेल्या भीषण आगीत 20 हून अधिक लोकांचा मृत्यू झाला आहे. मृतांमध्ये 5 पुरुष आणि 15 महिलांचा समावेश आहे, ज्यात एका गर्भवती महिलेचाही समावेश आहे.

ही भयानक आग सेंट्रल जकार्ता येथील एका भागात असलेल्या कार्यालयीन इमारतीला लागली होती. पोलिसांनी दिलेल्या माहितीनुसार, आगीच्या ज्वाळांनी लवकरच सात मजली इमारतीला वेढले, ज्यामुळे आकाशात काळ्या धुराचे लोट पसरले आणि आजूबाजूच्या परिसरात घबराट निर्माण झाली.

सेंट्रल जकार्ताचे पोलीस प्रमुख सुसात्यो पुरनोमो कोंड्रो यांनी या घटनेची पुष्टी करताना सांगितले, “आतापर्यंत 20 मृतदेह बाहेर काढण्यात आले आहेत.” त्यांनी पुढे सांगितले की, या इमारतीत टेरा ड्रोन इंडोनेशिया कंपनीचे कार्यालय होते, जी खाणकाम ते कृषी क्षेत्रासाठी ड्रोन सेवा पुरवते.

A fire in an office building in Indonesia’s capital, Jakarta, has killed at least 17 people, police said. https://t.co/if3edxssLp

— The Associated Press (@AP) December 9, 2025

पहिल्या मजल्यावरून पसरली आग-

अधिकाऱ्यांनी सांगितले की, ही आग इमारतीच्या पहिल्या मजल्यावर लागली आणि त्यानंतर वेगाने वरच्या मजल्यांवर पसरली. ही घटना घडली तेव्हा काही कर्मचारी दुपारचे जेवण करत होते, तर अनेक जण इमारतीबाहेर होते. Kompas TV वर दाखवलेल्या फुटेजमध्ये अग्निशमन दलाचे जवान लोकांना बाहेर काढण्यास मदत करताना दिसले. काही लोकांना वाचवण्यासाठी पोर्टेबल शिड्यांचाही वापर करण्यात आला.

सध्या आगीवर नियंत्रण मिळवण्यात आले आहे, आणि अधिकारी अजूनही लोकांना बाहेर काढण्यावर आणि सुरक्षेवर लक्ष केंद्रित करत आहेत. आग लागण्याचे नेमके कारण अद्याप समजू शकलेले नाही, या प्रकरणाचा तपास सुरू आहे.

दरम्यान, इंडोनेशियातील ही आग गेल्या महिन्यात हाँगकाँगच्या ताई पो जिल्ह्यात लागलेल्या भीषण आगीनंतर घडली आहे, ज्यात सुमारे 160 लोकांचा मृत्यू झाला होता.