Aadi Anant Teaser : ज्येष्ठ अभिनेते अशोक सराफ आणि अभिनेता संकर्षण कऱ्हाडे यांच्या आगामी ‘आदि अनंत’ या चित्रपटाची प्रेक्षकांमध्ये उत्सुकता निर्माण झाली आहे. काही दिवसांपूर्वी चित्रपटाचे पहिले पोस्टर प्रदर्शित झाले होते. पोस्टरमधील दोन्ही कलाकारांच्या लूकने चाहत्यांचे लक्ष वेधून घेतले होते. आता चित्रपटाचा टीझर प्रेक्षकांच्या भेटीला आला असून, त्यातून एका भावस्पर्शी कौटुंबिक कथेची झलक पाहायला मिळत आहे.

मुलांच्या संगोपनात आई-वडील महत्त्वाची भूमिका बजावत असले, तरी अनेक कुटुंबांमध्ये आजी-आजोबांचाही मोठा वाटा असतो. कामाच्या व्यस्त वेळापत्रकामुळे आई-वडिलांना अनेकदा मुलांसोबत पुरेसा वेळ घालवता येत नाही. अशा वेळी आजी-आजोबांच्या सहवासात वाढणाऱ्या नातवंडांचे त्यांच्याशी एक वेगळेच भावनिक नाते निर्माण होते. ‘आदि अनंत’चा टीझरही याच नात्याची हळवी बाजू अधोरेखित करताना दिसतो.

या चित्रपटात अशोक सराफ आजोबांच्या भूमिकेत, तर संकर्षण कऱ्हाडे नातवाच्या भूमिकेत दिसणार आहेत. आजोबा आणि नातवामधील प्रेम, जिव्हाळा आणि भावनिक बंध यांची गोष्ट या चित्रपटातून उलगडणार असल्याचे टीझरवरून जाणवते. ही कथा प्रेक्षकांना कधी हसवेल, तर कधी भावुक करेल, अशी अपेक्षा व्यक्त केली जात आहे.

मात्र, चित्रपटाची नेमकी कथा काय असेल, याचा पूर्ण अंदाज टीझरवरून येत नाही. तरीही आजोबा आणि नातवाच्या नात्याभोवती फिरणारी ही गोष्ट प्रेक्षकांना भावनिक अनुभव देण्याची शक्यता आहे.

या चित्रपटाचे दिग्दर्शन महेश लिमये यांनी केले आहे. कथा, पटकथा आणि संवादलेखनाची जबाबदारी संकर्षण कऱ्हाडे यांनी सांभाळली आहे. चित्रपटात सखी गोखले, वैदेही परशुरामी, योगेश शिरसाट, कविता लाड, आरव अहीर, श्रीरंग गोडबोले आणि गुरु ठाकूर हे कलाकारही महत्त्वाच्या भूमिकांमध्ये दिसणार आहेत. ‘आदि अनंत’ हा चित्रपट येत्या १२ नोव्हेंबर रोजी प्रेक्षकांच्या भेटीला येणार आहे.

Eknath Shinde : राहुल गांधी यांनी देशातील 140 कोटी जनतेची माफी मागावी; एकनाथ शिंदे असं का म्हणाले?