दिल्ली – भारतात बेकायदेशीरपणे राहणाऱ्या बांगलादेशी नागरिकांना कोणत्याही प्रकारे मदत करणाऱ्यांवर पोलिस तक्रार अर्थात एफआयआर दाखल केला जाईल. दिल्लीत बेकायदेशीरपणे राहणाऱ्या बांगलादेशींना ओळखण्यासाठी आणि त्यांना बांगलादेशात परत पाठवण्यासाठी संपूर्ण ताकदीने मोहीम सुरू करण्यात आली आहे.

दिल्ली पोलिस आयुक्तांनी सर्व जिल्हा पोलिस उपायुक्तांना बेकायदेशीरपणे राहणाऱ्या बांगलादेशींचा शोध घेऊन त्यांना हद्दपार करण्याचे कडक आदेश दिले आहेत. दिल्ली पोलिस अधिकारी, दिल्लीचे मुख्यमंत्री आणि इतर अधिकाऱ्यांसोबत झालेल्या बैठकीत केंद्रीय गृह मंत्रालयाने कडक आदेश दिले आहेत.

देशातील विविध राज्यांतील विधानसभा निवडणुकांमुळे राष्ट्रीय राजधानीत राहणाऱ्या बेकायदेशीर बांगलादेशींविरुद्धची मोहीम थांबवण्यात आली होती. विधानसभा निवडणुकीपूर्वी, दिल्ली पोलिस बेकायदेशीरपणे राहणाऱ्या बांगलादेशींची ओळख पटविण्यासाठी एक विशेष मोहीम राबवत होते.

या मोहिमेअंतर्गत, दिल्ली पोलिसांनी आतापर्यंत सुमारे १०० बांगलादेशींना हद्दपार केले आहे. त्याच वेळी ५०० हून अधिक जणांच्या संशयास्पद कागदपत्रांची तपासणीही केली जात आहे.

गेल्या महिन्यात, उलेमा आणि मुस्लिम नेत्यांच्या शिष्टमंडळाने लेफ्टनंट गव्हर्नर व्ही. के. सक्सेना यांची भेट घेतली होती. दर्गा हजरत निजामुद्दीन आणि बस्ती हजरत निजामुद्दीन येथील प्रमुख उलेमा आणि शहरातील मुस्लिम रहिवाशांच्या शिष्टमंडळाचे सदस्य या बैठकीला उपस्थित होते.

उपराज्यपाल म्हणाले की…

१. जर कोणा नागरिकाला त्यांच्या परिसरात कोणताही बेकायदेशीर बांगलादेशी घुसखोर राहत असल्याचे कळले तर त्यांनी या संदर्भात पोलिसांना कळवावे

२. रस्ते, पदपथ, उद्याने आणि इतर सरकारी जमिनींवरील बेकायदेशीर अतिक्रमण हटवावे

३. बांगलादेशी घुसखोरांनी बेकायदेशीरपणे मिळवलेले आधार कार्ड, मतदार ओळखपत्र किंवा इतर कोणतेही सरकारी कागदपत्रं तात्काळ रद्द करावीत

४. जर कोणत्याही मशीद किंवा मदरशाने बांगलादेशी घुसखोरांना आश्रय दिला असेल तर ते ठिकाण ताबडतोब रिकामे करावेत.