प्रभात वृत्तसेवा पिंपरी ( प्रकाश गायकर ) – पिंपरी चिंचवड महापालिकेच्या सार्वत्रिक निवडणुकीसाठी सर्वच पक्षांनी जोरदार तयारी सुरू केली आहे. महायुतीमध्ये मिठाचा खडा पडला असून यापूर्वीच राष्ट्रवादी काँग्रेसने स्वबळावर लढण्याची घोषणा केली आहे. त्यामुळे पिंपरी पालिकेसाठी भाजप, शिवसेना आणि आरपीआय यांची युती होईल, असे वाटत असतानाच आता भाजप शिवसेनेलाही सोबत घेण्याच्या तयारीत नसल्याचे कळते. एकनाथ शिंदे यांच्या शिवसेनेने स्वतंत्र लढण्याची तयारी सुरू केली आहे. त्याबाबत भाजपाच्या आमदारांना पदाधिकाऱ्यांना तशा सूचना दिल्या असून सर्व प्रभागांमध्ये स्वबळावर लढण्याची तयारी करण्याचे आदेश दिले आहेत.राज्यामध्ये भाजप, राष्ट्रवादी काँग्रेस आणि शिवसेना या पक्षांचे महायुतीचे सरकार आहे. मागील महिन्यापासून स्थानिक स्वराज्य संस्थांच्या निवडणुकांचे बिगुल वाजले आहेत. त्या पार्श्वभूमीवर काही ठिकाणी हे तीनही पक्ष वेगळे लढत आहेत. तर काही ठिकाणी महायुतीच्या माध्यामातून एकत्र आहेत. स्थानिक राजकारणाची गणिते आणि कार्यकर्त्यांनी गेल्या अनेक वर्षांपासून केलेली तयारी लक्षात घेता युतीबाबतचा निर्णय हा स्थानिक पातळीवर घेण्याबाबत जास्त मुभा स्थानिक पदाधिकार्यांना देण्यात आल्या आहेत. पिंपरी चिंचवड महापालिकेसाठी भाजपा आणि राष्ट्रवादी काँग्रेस अजित पवार गटांमध्ये चुरस आहे. राष्ट्रवादीच्या स्थानिक पदाधिकार्यांनी यापूर्वीच अजित पवार यांची भेट घेत स्वबळावर लढण्याची विनंती केली होती. त्याला पवार यांनी सकारात्मक प्रतिसाद दिला असून स्वबळावरच लढण्याचे संकेत दिले आहेत. तर भाजपाचे वरिष्ठ नेत्यांनी हायब्रिड युती करण्याची शक्कल लढवली आहे. मात्र, त्याला स्थानिक पदाधिकार्यांचा विरोध असल्याचे समोर आले आहे.दरम्यान, राष्ट्रवादी काँग्रेस स्वबळावर लढली तरी शिवसेना आणि रिपब्लिकन पार्टी ऑफ इंडिया (आरपीआय) आठवले गट हे एकत्र निवडणूक लढवतील अशी शक्यता होती. मात्र, आता शिवसेनेने देखील स्वतंत्र लढण्यासाठी चाचपणी करत आहे. नुकताच खासदार श्रीरंग बारणे यांनी शिवसेनेचा मेळावा घेत १२८ जागा लढविण्याची घोषणा केली आहे. त्यामुळे भाजपा आणि शिवेसेना देखील सोबत लढणार नसल्याच्या चर्चां धरत आहेत. याबाबत भाजपच्या स्थानिक आमदारांनी पदाधिकारी व इच्छुकांना आरपीआयला सोबत घेत सर्व जागांवर लढण्याची तयारी करा असे आदेश दिल्याने दुजोरा मिळाला आहे. शिवसेनेची ताकद किती? सन २०१७ च्या महापालिका निवडणुकीमध्ये एकसंध शिवसेनेने ९ जागांवर यश मिळवले होते. त्यावेळी देखील वरवर एकसंध वाटणारी शिवसेना गटा-तटामध्ये विभागली होती. आता तर त्याच शिवसेनेत उभी फूट पडून कार्यकर्ते, पदाधिकाऱ्यांची पांगापांग झाली आहे. त्यावेळचे शिवसेनेचे राहुल कलाटे सध्या राष्ट्रवादी काँग्रेसमध्ये आहेत. त्यांच्यासोबत आणखी काही माजी नगरसेवक असून त्यांच्या भाजप प्रवेशाची चर्चा सुरू आहे. सध्या शिवसेनेचे विद्यमान खासदार श्रीरंग बारणे असून चिंचवड विधानसभेमध्ये त्यांची ताकद आहे. विशेष म्हणजे ते राहत असलेल्या थेरगाव भागामध्ये त्यांचे वर्चस्व असून .तिथून त्यांचा मुलगा आणि पुतण्या लढण्याच्या तयारीत आहेत. “शिवसेनेने जर १२८ जागा लढविण्याची घोषणा केली असेल तर तो त्यांच्या पातळीवरचा विषय आहे. मात्र, आम्ही यापूर्वीच शत-प्रतिशतचा नारा देत संपूर्ण १२८ जागांवर तयारी केली आहे. भाजपा महापालिकेला स्वबळावरच तयारी करत आहे. अद्याप वरिष्ठांचा याबाबत आदेश आला नाही, मात्र आमची तयारी स्वबळाची आहे.” – शत्रुघ्न काटे, शहराध्यक्ष, भाजपा.
