Devendra Bhuyar Controversial Statement ।  अमरावतीच्या मोर्शी वरुड मतदारसंघाचे अजित पवार समर्थक आमदार देवेंद्र भुयार यांनी मुलींबाबत संतापजनक विधान केले आहे. सुंदर मुलगी तुमच्या माझ्या- सारख्याला भेटत नाही, ती नोकरीवाल्या मुलाला मिळते, दोन नंबरची मुलगी किराणा दुकानदाराला अन् तीन नंबरचा गाळ शेतकऱ्याला मिळतो, असे देवेंद्र भुयार म्हणाले आहे. भुयार यांनी केलेल्या या वक्तव्यावरून आता विरोधी पक्षाच्या नेत्यांकडून संतप्त प्रतिक्रिया उमटत आहेत.

भुयार यांनी महिलांबाबत केलेल्या वादग्रस्त विधानांचा व्हिडिओ सध्या चांगलाच व्हायरल झाला आहे. या व्हिडिओत ते म्हणाले, ‘मुलगी जर पाहायला चांगली तिला पोरगा गोरा पाहिजे, मुलगी स्मार्ट पाहिजे असेल, एक नंबर देखणी असेल तर ती तुमच्या माझ्या सारख्याला भेटत नाही, ती नोकरीवाल्या मुलाला भेटते, दोन नंबरची मुलगी पानटपरी वाल्याला, किराणा दुकानदाराला भेटते.’

ते पुढे म्हणाले, ‘तीन नंबरचा राहिलेला गाळ, हेबडली हाबडलेली मुलगी शेतकऱ्याच्या पोट्ट्याला मिळते, म्हणजे शेतकऱ्यांच्या पोराचं खरं राहिलं नाही..माय इल्लू पिल्लू त्याच्या पोटी वानराचे पिल्लू असाच कार्यक्रम आहे’ अशा भाषेत भुयार यांनी महिलांवर टीका केली आहे.  एकीकडे पक्षाचे अध्यक्ष अजित पवार लाडकी बहीण योजनेचा दणक्यात प्रचार करत असतानाच समर्थक आमदाराने केलेल्या या विधानाने सर्वत्र संताप व्यक्त केला जात आहे.

त्यांच्या या विधसांवरून आता काँग्रेसच्या महिला आमदार यशोमती ठाकूर यांनी संताप व्यक्त केला आहे. त्या म्हणाल्या,’मला आश्चर्य वाटते ज्या ठिकाणी अजित पवार यांचा लाडक्या बहिणीचा कार्यक्रम होतो आणि त्याच ठिकाणच्या आमदारांचा महिलांकडे अपशब्द मध्ये बघण्याचा त्यांचा दृष्टिकोन आहे. अजित पवार आणि सत्ताधाऱ्यांनी त्यांच्या आमदारांना कंट्रोलमध्ये ठेवावं, अशा प्रकारचा महिलांचा वर्गीकरण कोणीही खपून घेणार नाही, असा इशारा यशोमती ठाकूर यांनी दिला आहे.