Yash : बहुचर्चित ‘रामायण’ चित्रपटाची सध्या सर्वत्र चर्चा सुरू आहे. चित्रपटातील कलाकारांच्या लूकपासून त्यांच्या अभिनयापर्यंत प्रत्येक गोष्टीचे प्रेक्षकांकडून कौतुक होत आहे. मात्र, लंकाधिपती रावणाच्या भूमिकेत झळकणारा अभिनेता यश विशेष चर्चेत आहे. या भूमिकेसाठी यशने घेतलेली मेहनत आणि त्याच्या भव्य पोशाखाचा तपशील आता समोर आला आहे.

एखादी आव्हानात्मक भूमिका पडद्यावर प्रभावीपणे साकारण्यासाठी कलाकाराला प्रचंड मेहनत घ्यावी लागते. त्यातही रावणासारखी प्रभावशाली आणि भव्य व्यक्तिरेखा साकारताना अभिनयासोबतच वेशभूषेलाही तितकेच महत्त्व असते. यशने रावणाच्या भूमिकेसाठी विशेष मेहनत घेतली आहे.

चित्रपटाच्या कॉस्च्युम डिझायनर सानिया सरदारिया यांनी नुकत्याच दिलेल्या मुलाखतीत यशच्या रावणाच्या पोशाखाबाबत अनेक रंजक गोष्टी सांगितल्या. यशला अनेकदा १६ ते २० किलो वजनाचे पोशाख परिधान करावे लागत होते. काही प्रसंगांमध्ये त्याच्या संपूर्ण पोशाखाचे वजन तब्बल ३० ते ३३ किलोपर्यंत जात होते.

मुकुटाचे वजन कमी करण्यासाठी आम्ही अनेक प्रयत्न केले

यशच्या मुकुटाबाबत माहिती देताना सानिया म्हणाल्या, “सर्वात कठीण गोष्ट म्हणजे मुकुट परिधान करणे. कारण डोक्यावर थोडेसे वजन असले तरी ते खूप जड वाटते. मुकुटाचे वजन कमी करण्यासाठी आम्ही अनेक प्रयत्न केले. त्यासाठी अनेक 3D मॉडेल्स तयार करण्यात आली. आधी मुकुटाची रचना निश्चित केली आणि त्यानंतर तो हलका करण्यावर काम केले. मात्र, त्याचे वजन १.८ किलोपेक्षा कमी करता आले नाही. हेच त्याचे सर्वात कमी वजन होते आणि तेही खूप जड होते. यशच्या चेहऱ्यावर अस्वस्थता दिसत नव्हती; मात्र इतका जड मुकुट घालणे त्याच्यासाठी कठीण होते.”

जड पोशाखामुळे यशला सेटवर चालताना आणि फिरताना अनेक अडचणींचा सामना करावा लागत होता. चित्रीकरणाचे दीर्घ तास आणि पोशाखाचे प्रचंड वजन अशा आव्हानांनंतरही यशने संपूर्ण प्रक्रिया विनोदी पद्धतीने घेतली. तो सेटवरील वातावरण हलकेफुलके ठेवत सर्वांना हसवत असे, असेही सानिया यांनी सांगितले.

दरम्यान, ‘रामायण’ चित्रपटाचे कौतुक होत असतानाच काही दृश्यांवरून वाद निर्माण झाल्याचीही चर्चा आहे. त्यामुळे चित्रपटाबाबत प्रेक्षकांमध्ये उत्सुकतेसोबतच संमिश्र प्रतिक्रिया पाहायला मिळत आहेत.

Govardhan Puja : गोवर्धन पूजेनिमित्त पंतप्रधान मोदींनी गायींना भरवला चारा; खास फोटो सोशल मीडियावर केले शेअर!