बेंगळुरू  – कर्नाटकातील कोप्पलच्या जिल्हा न्यायालयाने दलित समाजातील लोकांवरील अत्याचार आणि जातीय हिंसाचार प्रकरणी मोठा निकाल दिला आहे. दलित समाजाच्या झोपड्यांना आग लावल्याप्रकरणी न्यायालयाने 101 जणांना शिक्षा सुनावली आहे. 101 दोषींपैकी 98 दोषींना जन्मठेप आणि 5000 रुपये दंडाची शिक्षा सुनावण्यात आली आहे. अन्य तीन दोषींना 5 वर्षे सश्रम कारावास आणि 2000 रुपये दंडाची शिक्षा सुनावण्यात आली आहे.

न्या. चंद्रशेखर सी यांनी गुरुवारी या प्रकरणी 101 जणांना दोषी ठरवले होते. फिर्यादी पक्षाने याबाबत माहिती दिली. सरकारी वकील अपर्णा बुंदी यांनी सांगितले की या प्रकरणात 117 लोक आरोपी होते. त्यापैकी 16 जणांचा खटल्यादरम्यान मृत्यू झाला. सध्या जन्मठेपेची शिक्षा झालेले सर्व दोषी बल्लारी मध्यवर्ती कारागृहात आहेत. देशात जातीय हिंसाचाराच्या प्रकरणात पहिल्यांदाच इतक्या लोकांना एकत्रितपणे शिक्षा सुनावण्यात आल्याचे सांगण्यात येत आहे.

प्रकरण आहे 2014 मधील…
ही बाब 28 ऑगस्ट 2014 ची आहे. गावातील हॉटेल आणि न्हाव्याच्या दुकानात दलितांना प्रवेश नाकारल्याने पीडित आणि आरोपींमध्ये हाणामारी झाली. त्यानंतर आरोपींनी गंगावती तालुक्यातील मरकुंबी गावात दलित समाजातील लोकांची घरे पेटवून दिली. या घटनेनंतर राज्यभरात अनेक ठिकाणी निदर्शने झाली. या हिंसाचारामुळे मराकुंबीला तीन महिन्यांपासून पोलिसांच्या कडक निगराणीत ठेवण्यात आले होते. या हिंसाचाराच्या निषेधार्थ राज्य दलित हक्क समितीने मराकुंबी ते बेंगळुरू असा मोर्चाही काढला होता. तसेच गंगावती पोलीस ठाण्याला अनेक दिवसांपासून घेराव घालण्यात आला होता.