मुंबई : नवी मुंबईतील न्हावा शेवा बंदरात शनिवारी महसूल गुप्तचर संचालनालयाने (डीआरआय) सुमारे १२ कोटी रुपयांचे पाकिस्तानी सौंदर्यप्रसाधने आणि सुक्या खजूर घेऊन जाणारे २८ कंटेनर जप्त केले आहेत. यामध्ये दोन जणांना अटक करण्यात आली आहे. ‘ऑपरेशन डीप मॅनिफेस्ट’ अंतर्गत भारताच्या सर्वोच्च तस्करी विरोधी पथकाने ही कारवाई केली आहे. यामध्ये ८०० टन पाकिस्तानी सौंदर्यप्रसाधने आणि कोरड्या खजूरांनी भरलेले हे कंटेनर जप्त केले आहेत. पाकिस्तानी वस्तूंच्या आयातीवर सरकारने लादलेल्या निर्बंधांचे उल्लंघन करून तीन भारतीय आयातदारांनी हे कंटेनर खरेदी केले होते, असे अधिकाऱ्यांनी सांगितले आहे. कमिशनच्या आधारावर काम करणाऱ्या दुबईतील एका भारतीय नागरिकाने बनावट पावत्या तयार करून पाकिस्तानातून सुक्या खजूरांच्या ट्रान्सशिपमेंटला मदत केली. त्याने समुद्री वाहतूक मार्ग लपवण्यासाठी त्याच्या कंपन्यांचा वापर केल्याचा आरोप आहे. कंटेनर दुबईतील जेबेल अली बंदरातून युएई मूळचे असल्याचे चुकीचे घोषित करून पाठवण्यात आले होते. हा माल पाकिस्तानी, भारतीय आणि युएई नागरिकांच्या व्यवहारांच्या गुंतागुंतीच्या जाळ्यातून पाठवण्यात आला होता, जेणेकरून त्यांचे खरे मूळ अस्पष्ट होईल.त्याच्यामार्फत भारतातून पाकिस्तानात पैसे पाठवण्यात आले होते, असे अधिकाऱ्याने सांगितले. उत्पत्तीचा देश खोटा असल्याचे सांगून पाकिस्तानातून सौंदर्यप्रसाधनांची तस्करी करण्यास मदत केल्याबद्दल एका कस्टम ब्रोकरलाही अटक करण्यात आली आहे, असे अधिकाऱ्यांनी सांगितले. २२ एप्रिल रोजी पहलगाम येथे झालेल्या दहशतवादी हल्ल्याच्या पार्श्वभूमीवर केंद्राने २ मे रोजी पाकिस्तानी वस्तूंच्या प्रत्यक्ष किंवा अप्रत्यक्ष आयातीवर पूर्ण बंदी घातली आहे.
