Maharashtra Politics : राज्यातील राजकारणात महायुती गठबंधनात पुन्हा एकदा धुसफूस निर्माण झाली असून, सिंधुदुर्ग जिल्ह्यातील कुडाळ नगरपंचायतीत भाजपच्या आठ नगरसेवकांपैकी सहा जणांना पक्षातर्फे निलंबनाची कारवाई करण्यात आली आहे. ही कारवाई शिंदे गटाच्या शिवसेनेसोबतच्या जवळीकामुळे झाल्याचे सांगितले जात आहे. या घटनेमुळे सिंधुदुर्गातील महायुतीत खळबळ उडाली असून, गठबंधनातील अंतर्गत कलह पुन्हा समोर आला आहे. याबाबतचे व्हिडिओ आणि बातम्या सोशल मीडियावर व्हायरल होत आहेत. यामुळे स्थानिक राजकारणात नव्या चर्चांना उधाण आले आहे. नेमकं प्रकरण काय? कुडाळ नगरपंचायतीत भाजपकडे एकूण आठ नगरसेवक आहेत, आणि त्यापैकी सहा जणांना शिस्तभंगाच्या कारणास्तव पक्षातर्फे निलंबित करण्यात आले आहे. भाजपचे सिंधुदुर्ग जिल्हाध्यक्ष प्रभाकर सावंत यांनी या सर्वांना नोटिसा बजावल्या आहेत. नगराध्यक्ष प्राजक्ता बांदेकर, नयना मांजरेकर, अभिषेक गावडे, विलास कुडाळकर, राजीव कुडाळकर, चांदणी कांबळी याना निलंबनाच्या नोटिसा बजावल्या आहेत. हे सर्व नगरसेवक भाजपच्या तिकिटावर निवडून आले होते, पण आता ते पक्षविरोधी कारवाई करीत असल्याचे आरोप आहेत. प्रभाकर सावंत यांनी सिंधुदुर्ग जिल्हाधिकाऱ्यांना पत्र लिहून याबाबत माहिती दिली असून, “हे नगरसेवक पक्षविरोधी कारवाई करीत असल्याने त्यांच्यावर पक्षातर्फे निलंबनाची कारवाई करण्यात येत आहे. त्यांच्याबाबत योग्य आदेश निर्गमित करावेत,” असे पत्रात नमूद केले आहे. या पत्रामुळे या नगरसेवकांची पक्षातील सदस्यत्वे तात्पुरती निलंबित झाली असून, नगरपंचायतीतील निर्णयप्रक्रियेवर परिणाम होण्याची शक्यता आहे. महायुतीतील धुसफूस ही कारवाई केवळ शिस्तभंगापुरती मर्यादित नसून, महायुतीतील अंतर्गत संघर्षाचे लक्षण आहे. काही दिवसांपूर्वीच भाजप जिल्हाध्यक्ष प्रभाकर सावंत यांनी शिंदे गटाच्या शिवसेनेचे सिंधुदुर्ग जिल्हाप्रमुख दत्ता सामंत यांच्याविरुद्ध थेट उपमुख्यमंत्री एकनाथ शिंदे यांच्याकडे तक्रार नोंदवली होती. आता या निलंबनामुळे शिंदे शिवसेनेशी जवळीक साधणाऱ्या भाजप नगरसेवकांना लक्ष्य करण्यात आल्याचे चित्र आहे.
