मृतांच्या वारसांना ३ लाख, जखमींना १ लाख रुपयांपर्यंत मदत
PMPML : पीएमपीएमएलच्या स्वमालकीच्या बसमुळे अपघात होऊन नागरिकांच्या वैयक्तिक अथवा सार्वजनिक मालमत्तेचे नुकसान झाल्यास आता संबंधित मालमत्ताधारकांना नुकसान भरपाई मिळणार आहे.

बस अपघातातील मृतांच्या वारसांना देण्यात येणारी आर्थिक मदत दोन लाखांवरून तीन लाख रुपये, तर जखमींसाठीची मदत ५० हजारांवरून एक लाख रुपयांपर्यंत वाढविण्यात आली आहे, अशी माहिती महापौर मंजुषा नागपुरे यांनी दिली. मालमत्ता नुकसान भरपाईसाठी पीएमपीएमएलने प्रथमच स्वतंत्र धोरण निश्चित केले आहे.

महापालिकेच्या सभागृहातील पीएमपीएमएलच्या विशेष सभेत नागरिकांच्या मालमत्तेच्या सुरक्षेचा प्रश्न उपस्थित करण्यात आला होता. त्यानंतर महापौर मंजुषा नागपुरे यांच्या पुढाकाराने संचालक मंडळाच्या बैठकीत मालमत्ता नुकसान भरपाईचा प्रस्ताव एकमताने मंजूर करण्यात आला.

या बैठकीस पिंपरी- चिंचवडचे महापौर रवी लांडगे, पुणे स्थायी समिती अध्यक्ष श्रीनाथ भिमाले, पिंपरी-चिंचवड स्थायी समिती अध्यक्ष अभिषेक मारणे, पीएमपीएमएल संचालक अजय खेडेकर, पुणे महापालिका आयुक्त नवल किशोर राम, पिंपरी- चिंचवड महापालिका आयुक्त डॉ. विजय सूर्यवंशी आणि पीएमपीएमएलचे अध्यक्ष व व्यवस्थापकीय संचालक महेश आव्हाड उपस्थित होते.

अपघातानंतर मालमत्तेच्या नुकसानीचे मूल्यांकन बाह्य संस्था किंवा तज्ज्ञांकडून करण्यात येणार आहे. त्यानंतर प्रत्यक्ष नुकसानीच्या आधारे भरपाई निश्चित केली जाईल. संबंधित मालमत्ताधारकाकडून प्रतिज्ञापत्र घेण्यात येणार आहे. हे धोरण पीएमपीएमएलच्या खासगी बस पुरवठादारांनाही लागू राहणार आहे.

 दोन दुकानांना भरपाई
२१ एप्रिल २०२६ रोजी अप्पा बळवंत चौक, प्रभात टॉकीजजवळ झालेल्या बस अपघातातील दोन दुकानांचे मूल्यांकन करण्यात आले आहे. त्यानुसार प्रकाश कार्ड्सचे मालक विनोद पतंगे यांना ४ लाख ७० हजार ५३१ रुपये, तर बालाजी कार्ड्सचे मालक आकाश धनसिंग नायकडा यांना ४५ हजार ९६२ रुपये भरपाई देण्यात येणार आहे.