पौड : अतिवृष्‍टीमुळे आदरवाडी (ता.मुळशी) येथे हॉटेल वर दरड कोसळुन मृत्‍युमुखी पडलेल्‍या शिवाजी मोतीराम बहिरट, (वय.३०) या तरुणाच्‍या कुटूंबाला शासनाच्‍यावतीने तातडीची मदत म्‍हणून चार लाखांचा मदतनिधी धनादेश स्‍वरुपात आमदार संग्राम थोपटे, तहसीलदार रणजीत भोसले यांच्‍या हस्‍ते रविवार (ता.२८) बहिरट कुटूंबाला आदरवाडी येथील त्‍यांच्‍या घरी देण्‍यात आला.

गुरुवार (दि.२५) रोजी झालेल्या अतिवृष्टीत आदरवाडी येथे डोंगरातील दरड कोसळून हॉटेल पिकनिक पॉईंट दगड, मातीत गाडले गेले. या दुर्घटनेत शिवाजी बहिरट या युवकाचा दुर्दैवी मृत्‍यु झाला होता. शिवाजी हा त्‍यांच्‍या बहिरट कुटूंबातील कर्ता होता.

त्‍यामुळे बहिरट कुटूंबावर कोसळलेल्‍या या संकटाची दखल घेऊन आमदार संग्राम थोपटे यांनी शासनाकडे तातडीने मदत निधी मिळण्‍यासाठी प्रयत्‍न केले. अवघ्‍या काही दिवसांत चार लाखांचा तातडीचा मदत निधी मंजुर करुन घेतला. शिवाजी हा त्‍यांच्‍या कुटूंबातील कमावता, कर्ता व्‍यक्‍ती होता.

दरड कोसळून त्‍याच्‍या जाण्‍याने बहिरट कुटूंबावर आर्थिक संकटही कोसळले असल्‍याने त्‍याच्‍या कुटूंबातील व्‍यक्‍तीला प्राधान्‍याने सरकारी नोकरीत घ्‍यावे अशी मागणी ग्रामस्‍थांनी केली. यावेळी आमदार संग्राम थोपटे, तहसिलदार रणजित भोसले यांच्‍याबरोबर, गंगाराम मातेरे, गोपाळ कदम, सरपंच स्वाती चोरघे, दीप बामगुडे, सुहास बामगुडे, योगेश बामगुडे, लक्ष्मण ठोंबरे, संदीप केदारी, मंडल अधिकारी, तलाठी आदी उपस्थित होते.

मुख्‍यमंत्री सहायता निधीतून अजुन मदत निधी मिळवुन देण्‍याचे, तसेच हॉटेलच्‍या नुकसानीचे भरपाई मिळवुन देण्‍याचे आश्‍वासन आमदार थोपटे यांनी दिले आहे. बहिरट कुटुंबाला आर्थिक मदतीची अत्यंत गरज असून समाजातील दानशूर व्यक्ती,संस्था यांनी मदत करण्याचे आवाहन माजी सरपंच योगेश बामगुडे यांनी केले आहे.