अक्कलकोट : येथील श्री स्वामी समर्थ अन्नछत्र मंडळाच्या वतीने गेल्या २९ वर्षांपासून आयोजित करण्यात येणाऱ्या श्री स्वामी समर्थ पालखी परिक्रमेचे यंदा ३० वे वर्ष आहे. गुरुवार, दि. १२ नोव्हेंबर रोजी सकाळी ११ वाजता श्रीक्षेत्र अक्कलकोट येथून या पालखी परिक्रमेचा शुभारंभ होणार असून, तब्बल आठ महिने चालणारी ही परिक्रमा महाराष्ट्रासह कर्नाटक आणि गोवा राज्यांतील विविध गावांतून मार्गक्रमण करणार आहे. बुधवार, दि. ७ जुलै २०२७ रोजी पालखी पुन्हा श्रीक्षेत्र अक्कलकोट येथे दाखल होणार असल्याची माहिती पालखी परिक्रमेचे मुख्य संयोजक संतोष भोसले यांनी दिली.

श्री स्वामी समर्थ अन्नछत्र मंडळाचे संस्थापक अध्यक्ष जनमेजयराजे विजयसिंहराजे भोसले यांच्या मार्गदर्शनाखाली आणि कार्यकारी अध्यक्ष अमोलराजे जनमेजयराजे भोसले यांच्या नेतृत्वाखाली या परिक्रमेचे आयोजन करण्यात येत आहे. पालखीचा शुभारंभ श्री वटवृक्ष स्वामी महाराज देवस्थानचे अध्यक्ष महेश इंगळे, मुख्य पुरोहित प.पू. वे.शा.स. मोहनराव गोविंदराव पुजारी तसेच श्री स्वामी समर्थ समाधी मठाचे पुजारी प.पू. अण्णू महाराज पुजारी व धनंजय पुजारी यांच्या हस्ते श्रींच्या पादुकांचे पूजन करून होणार आहे.

अक्कलकोट निवासी श्री स्वामी समर्थ महाराजांच्या पादुकांचे दर्शन महाराष्ट्रासह अन्य राज्यांतील गावोगावी असलेल्या स्वामी भक्तांना घेता यावे, या उद्देशाने या पालखी परिक्रमेचे आयोजन केले जाते. वयोवृद्ध, महिला तसेच विविध कारणांमुळे अक्कलकोटला येणे शक्य नसलेल्या भाविकांच्या भेटीसाठी जणू श्री स्वामी समर्थच त्यांच्या गावात येत असल्याची भक्तिभावाची भावना या परिक्रमेच्या माध्यमातून जोपासली जात आहे.

ही पालखी पश्चिम महाराष्ट्र, कोकण, बृहन्मुंबई, उत्तर महाराष्ट्र, खानदेश, मराठवाडा आणि विदर्भ या विभागांतून प्रवास करणार आहे. तसेच कर्नाटक व गोवा या शेजारील राज्यांतही परिक्रमा होणार आहे. गेल्या दीडशे वर्षांपासून श्री स्वामी समर्थांच्या साधू-संतत्वाची ख्याती आणि भक्तीचा सुगंध देशभर पसरला आहे. पालखीच्या माध्यमातून लाखो भाविकांना श्रींच्या पादुकांचे दर्शन घेण्याची आणि सेवा करण्याची संधी उपलब्ध होत आहे.

दरम्यान, श्रीक्षेत्र अक्कलकोट येथे श्री स्वामी समर्थांच्या कृपाशीर्वादाने स्थापन झालेल्या श्री स्वामी समर्थ अन्नछत्र मंडळाच्या माध्यमातून दररोज हजारो भाविकांना दोन्ही वेळेस महाप्रसाद दिला जातो. याशिवाय सामाजिक, सांस्कृतिक, शैक्षणिक व क्रीडाविषयक उपक्रम, आपदग्रस्तांना मदत, शहरातील २६० दिव्यांग व निराधार व्यक्तींना समर्थ महाप्रसाद सेवा, तसेच तालुक्यातील सुमारे ७७ कुस्तीगीरांना दरमहा पौष्टिक खुराक देण्याचे कार्य न्यासाच्या वतीने केले जाते. आरोग्यविषयक उपक्रमांसह शासनाच्या विविध योजनांनाही न्यासाकडून सहकार्य केले जाते.

मंडळाच्या परिसरात यात्री निवास, यात्री भुवन, अतिथी निवास, महाप्रसाद गृह, ध्यानधारणा मंदिर, मंगल कार्यालय आदी सुविधा उभारण्यात येत आहेत. याशिवाय श्री शमी विघ्नेश गणेश मंदिर, उभी स्वामी मूर्ती, शिवस्मारक, कारंजे, इनडोअर व आउटडोअर जिम, वाहनतळ, श्री स्वामी समर्थ वाटिका, बालोद्यान, शिवचरित्र प्रदर्शन हॉल, अग्निशामक सेवा, रुग्णवाहिका, एसटी महामंडळाच्या चालक व वाहकांसाठी निवास व्यवस्था आणि सौरऊर्जा प्रकल्प अशा विविध सुविधा उपलब्ध करून देण्यात आल्या आहेत.

विशेष म्हणजे, नियोजित भव्य व सुसज्ज पाच मजली महाप्रसाद गृह इमारतीच्या बांधकामास १० नोव्हेंबर २०२४ पासून सुरुवात झाली असून, हा महत्त्वाकांक्षी प्रकल्प साकारत आहे.

आठ महिन्यांत १५ हजार किलोमीटरचा प्रवास!

श्री स्वामी समर्थ पालखी परिक्रमेच्या माध्यमातून सुमारे २३७ दिवसांत १५ हजार किलोमीटरपेक्षा अधिक प्रवास केला जातो. महाराष्ट्रातील सुमारे ३८ जिल्हे आणि ७५ तालुक्यांतील जवळपास ७८० गावांमध्ये पालखी पोहोचते. कर्नाटकातील बेळगाव तसेच गोवा राज्यातील विविध ठिकाणीही पालखीचा मुक्काम असतो.

बृहन्मुंबई, ठाणे, वसई-विरार, कल्याण-डोंबिवली, नवी मुंबई, पुणे या महानगरांसह सांगली, कोल्हापूर, सिंधुदुर्ग, रत्नागिरी, सातारा, रायगड, नाशिक, धुळे, नंदुरबार, जळगाव, छत्रपती संभाजीनगर, जालना, बुलढाणा, अकोला, अमरावती, नागपूर, वर्धा, यवतमाळ, वाशिम, नांदेड, अहिल्यानगर, धाराशिव, बीड आणि लातूर आदी जिल्ह्यांतून ही परिक्रमा मार्गक्रमण करते.

कर्नाटक, मध्य प्रदेश, आंध्र प्रदेश, केरळ तसेच गडचिरोली आणि परदेशातूनही पालखी परिक्रमेची मागणी होत असल्याचे न्यासाच्या वतीने सांगण्यात आले. पालखी परिक्रमेच्या अधिक माहितीसाठी मुख्य संयोजक संतोष भोसले (९८२२८१०९६६) यांच्याशी संपर्क साधावा, असे आवाहन करण्यात आले आहे.